সাৱধান ! এচিৰ পৰা ওলায়েই ৰ'দলৈ নাযাব...

ডিজিটেল ডেস্ক: গ্ৰীষ্মকালত ৰ’দ তথা গৰমৰ পৰা হাত সাৰিবলৈ আজিকালি অধিকাংশ লোকেই এয়াৰ কণ্ডিচনাৰ (AC) ব্যৱহাৰ কৰে। কিন্তু কেতিয়াবা এচিৰ ব্যৱহাৰে আপোনাৰ বাবে কাল চপাই আনিব পাৰে। হয়, বহু লোক এনে আছে, যিসকলে এচিৰ পৰা পোনে পোনে ৰ’দলৈ ওলাবলগীয়া হয়। এনে কৰিলে শৰীৰত গুৰুতৰ প্ৰভাৱ পৰে। যিয়ে মগজুৰ ৰক্তক্ষৰণৰ সম্ভাৱনা খুব বেছিকৈ বৃদ্ধি কৰে।

পোহৰলৈ আহিছে চাঞ্চল্যকৰ পৰিসংখ্যা

এপ্ৰিল মাহত তিনি দিন অৰ্থাৎ মাত্ৰ ৭২ ঘন্টাৰ ভিতৰতে জামছেদপুৰৰ এখন চিকিৎসালয়ত ২৯ জন ব্ৰেইন ষ্ট্ৰ'ক ৰোগী ধৰা পৰে। ইয়াৰ কাৰণ হৈছে আটাইকেইজন ৰোগীয়েই বহুসময় এচিত থাকি হঠাতে ৰ’দত ওলাই আহিছিল। এচিৰ পৰা ওলাই অহাৰ ১০–১৫ মিনিটৰ ভিতৰতে তেওঁলোকৰ শৰীৰত লক্ষণ দেখা দিবলৈ আৰম্ভ কৰিছিল। চিকিৎসকৰ মতে, হঠাৎ উষ্ণতাৰ এই পৰিৱৰ্তনে এজন ব্যক্তিৰ ৰক্তচাপৰ ভাৰসাম্যহীনতাৰ সৃষ্টি কৰে। যাৰ ফলত মগজুৰ ষ্ট্ৰ’ক বা ৰক্তক্ষৰণৰ দৰে গুৰুতৰ সমস্যাৰ সৃষ্টি হয়।

কিয় হয় বিপদ ?

এজন ব্যক্তি যেতিয়া এচিত বেছি সময় থাকে, তেতিয়া শৰীৰৰ উষ্ণতা ঠাণ্ডা পৰিবেশৰ লগত খাপ খাই পৰে। এনে পৰিস্থিতিত যদি কোনো ব্যক্তি হঠাতে উজ্জ্বল আৰু গৰম সূৰ্য্যৰ পোহৰলৈ ওলাই আহে, তেন্তে শৰীৰে এই পৰিৱৰ্তন সহ্য কৰাত অসুবিধা পায়। যাৰ ফলত হঠাতে ৰক্তচাপ বৃদ্ধি বা কমি যাব পাৰে আৰু এই অৱস্থাৰ ফলত মগজুৰ ৰক্তক্ষৰণ বা ষ্ট্ৰ’ক হ’ব পাৰে।

কোন লোক বেছি বিপদত পৰাৰ সম্ভাৱনা আছে ?

বিশেষজ্ঞৰ মতে, সকলো লোকেই এই বিপদত পৰিব পাৰে। কিন্তু তলত দিয়া লোকসকল বেছি সাৱধান হোৱাটো দৰকাৰ-

১) ৫০ বছৰৰ উৰ্ধৰ লোক।

২) ডায়েবেটিছ, উচ্চ ৰক্তচাপত আক্ৰান্তসকল।

৩) যিসকলৰ ৰোগ প্ৰতিৰোধ ক্ষমতা দুৰ্বল।

৪) যিকোনো সময়ত ৰ’দত খোজ কঢ়া মানুহ।

কি কয় বিশেষজ্ঞই ?

জামছেদপুৰৰ গোটেই ঘটনাটো নিৰীক্ষণ কৰা স্বাস্থ্য বিশেষজ্ঞৰ মতে, এচিৰ পৰা পোনপটীয়াকৈ ৰ'দলৈ ওলাই যোৱাটো মাৰাত্মক হ'ব পাৰে। দুয়োটা উষ্ণতাৰ মাজত নিজৰ শৰীৰটোক খাপ খুৱাবলৈ সময় দিয়াটো অতি গুৰুত্বপূৰ্ণ। এচিৰ পৰা ওলাই পোনে পোনে ৰ’দ বা  ৰ’দৰ পৰা অহাৰ লগে লগে এচিত বহিব নালাগে। সদায় স্বাভাৱিক উষ্ণতাত কিছু সময় কটাব লাগে, যাতে শৰীৰে অভ্যস্ত হ’ব পাৰে।

মগজুৰ ৰক্তক্ষৰণ কি?

মগজুৰ কোনো শিৰাত ৰক্তক্ষৰণ বা ফাটি গ’লে মগজুৰ ৰক্তক্ষৰণ হয়। ইয়াৰ বাবে মগজুৰ এটা অংশলৈ তেজৰ প্ৰবাহ বন্ধ হৈ যায়, যাৰ ফলত এজন ব্যক্তিৰ মৃত্যুও হ’ব পাৰে। বিশেষকৈ উচ্চ ৰক্তচাপ আৰু হঠাৎ উষ্ণতাৰ পৰিৱৰ্তনৰ বাবে এই অৱস্থাৰ সৃষ্টি হয়।

মগজুৰ ৰক্তক্ষৰণৰ লক্ষণ

১) মুখ, হাত বা ভৰি হঠাতে অজ্ঞান হৈ পৰা।

২) শব্দ ক’বলৈ বা বুজিবলৈ অসুবিধা।

৩) তীব্ৰ আৰু হঠাৎ মূৰৰ বিষ।

৪) বমি হোৱা।

৫) শৰীৰত জঠৰতা বা দুৰ্বলতা।

এই বিপদৰ পৰা কেনেকৈ হাত সাৰিব ? 

১) এচিৰ পৰা বাহিৰ হৈ লগে লগে ৰ’দলৈ ওলাই নাযাব। প্ৰথমে স্বাভাৱিক উষ্ণতাত বহিব লাগে।

২) ৰ’দত ওলাই যাওঁতে মূৰ আৰু শৰীৰ ঢাকি ৰাখিব। 

৩) পৰ্যাপ্ত পৰিমাণে পানী খাব।

৪) লঘু আৰু ঢিলা কাপোৰ পিন্ধিব।

৫) ৰক্তচাপ আৰু ডায়েবেটিছ ৰোগী অধিক সজাগ হ’ব লাগে।

৬) নিয়মীয়াকৈ শৰীৰ পৰীক্ষা কৰি থাকিব লাগে।