এইদৰে লাভ কৰিব পাৰি মহাদেৱৰ বিশেষ আৰ্শীবাদ

ডিজিটেল ডেস্ক: ভগৱান মহাদেৱৰ পূজা-অৰ্চনা কৰাৰ বাবে শাওন মাহটো অতি পবিত্ৰ বুলি গণ্য কৰা হয়। এইবেলি ১১ জুলাইৰ পৰা শাওন মাহ আৰম্ভ হৈ ৯ আগষ্টত সমাপ্ত হ'ব। বিশ্বাস অনুসৰি, মহাদেৱৰ ভক্তসকলে এই মাহটোত উপবাস ৰাখিলে সকলো মনৰ ইচ্ছা পূৰণ হয়। কিন্তু, এই মাহত কিছু বিশেষ নিয়ম মানি চলাটোও অতি প্ৰয়োজনীয়। ধৰ্মীয় গ্ৰন্থত এনে কিছুমান কৰ্মৰ কথা উল্লেখ আছে, যিসমূহ শাওন মাহটোত পৰিহাৰ কৰা উচিত। মহাদেৱৰ আৰাধনা কৰা এই দিনকেইটাত কি কৰিব নালাগে, জানো আহক-

চুলি-দাড়ি কটাৰ পৰা বিৰত থাকিব

এই মাহটোত চুলি বা দাড়ি কটা শুভ বুলি গণ্য কৰা নহয়। ইয়াৰ ফলত কামত বাধাৰ সৃষ্টি হ’ব পাৰে আৰু ইতিবাচক শক্তি হ্ৰাস পাব পাৰে।

শৰীৰত তেল নলগাব

স্কন্দ পুৰাণৰ মতে, শাওন মাহত শৰীৰ বা মূৰত তেল প্ৰয়োগ কৰিলে নেতিবাচক শক্তিৰ প্ৰভাৱ বৃদ্ধি পাব পাৰে। বিশেষকৈ, সোমবাৰে তেল লগোৱাটো সম্পূৰ্ণ নিষিদ্ধ বুলি গণ্য কৰা হয়। কাৰণ, এই দিনটো ভগৱান শিৱৰ বাবে উৎসৰ্গিত।

দৈ সেৱন নকৰিব

শাওনত দৈ খোৱাটোও অশুভ, বিশেষকৈ ৰাতি। ধৰ্মীয় বিশ্বাস অনুসৰি, ই শুক্ৰ দোষৰ কাৰণ হ’ব পাৰে আৰু ভাগ্যৰ অনুকূলতা হ্ৰাস কৰিব পাৰে। তাৰ পৰিৱৰ্তে আপুনি মাখন খাব পাৰে। 

গাখীৰ খোৱাৰ পৰা বিৰত থাকিব

মহাদেৱৰ নামত উৎসৰ্গিত এই মাহটোত শিৱলিংগত গাখীৰ আগবঢ়োৱাটো শুভ বুলি গণ্য কৰা হয়। কিন্তু এই মাহত গাখীৰ খোৱাটো অশুভ। এই দিনকেইটাত গাখীৰ খালে শৰীৰৰ তাপ আৰু ছালৰ সমস্যা বৃদ্ধি হ’ব পাৰে। উপবাসে থকাসকলে ফল-মূল আৰু পানীৰ দৰে সাত্ত্বিক বস্তু সেৱন কৰিব লাগে।

মাটিত শুব

শাওন মাহত উপবাসে থকা লোকসকলে বিচনাত শুব নালাগে। ধৰ্মীয় পৰম্পৰা অনুসৰি, মাটিত শুলে শৰীৰ আৰু মনৰ বিশুদ্ধতা বৰ্তি থাকে। আধ্যাত্মিক দৃষ্টিকোণৰ পৰাও ইয়াক উপকাৰী বুলি গণ্য কৰা হয়।

বি দ্ৰ: এই লেখাটো ইণ্টাৰনেটত উপলব্ধ তথ্যৰ ভিত্তিত লেখা হৈছে।