ডিজিটেল সংবাদ নগাঁও: উদ্যামী নগাঁৱৰ আয়ুক্ত ৷ নতুনক ভাল পায় নগাঁৱৰ আয়ুক্ত নৰেন্দ্ৰ কুমাৰ শ্বাহে ৷ নতুন পৰিকল্পনা, নতুন উদ্যাম, নতুন চিন্তাৰে কাম কৰি ভাল পোৱা বুলি নগাঁৱত বিদিত হৈছে আই এ এছ নৰেন্দ্ৰ কুমাৰ শ্বাহ ৷
মন গ’লে সকলো কাম কৰিব পাৰে আয়ুক্ত শ্বাহে ৷ এই ক্ষেত্ৰত কাকো পাৰোৱা নকৰে এই বিষয়াজনে ৷ ২০২৪ বৰ্ষত নগাঁৱত সুন্দৰভাবে কাম কৰিবৰ বাবে আই এ এছ নৰেন্দ্ৰ কুমাৰ শ্বাহে সজাইছে নিজৰ চৰকাৰী কোঠা ৷
নতুন বৰ্ষৰ পৰা ন উদ্যামেৰে, ন চিন্তাৰে, ন পৰিকল্পনাৰে নগাঁৱৰ প্ৰশাসন চলাবৰ বাবে আয়ুক্ত কাৰ্যালয়ৰ কোঠা সজাইছে শ্বাহে ৷ নগাঁৱৰ আয়ুক্ত কাৰ্যালয়ৰ আয়ুক্তৰ নিজা কোঠাটোৰ ভিতৰভাগটোৰ বেৰত থকা কাঠ আতৰাই পেলোৱা হৈছে ৷
মূল্যবান চেগুন কাঠেৰে নিৰ্মিত কোঠাৰ বেৰ আই এ এছ নৰেন্দ্ৰ কুমাৰ শ্বাহৰ বাবে পদন্দৰ নহয় ৷ বুবু-বাবা মতে প্ৰশাসন চলোৱাত বাধা পাইছে আয়ুক্ত শ্বাহে ৷ জানিব পৰা মতে পূৰ্বৰ উপায়ুক্ত আৰু বৰ্তমানৰ আয়ুক্তৰ কাৰ্যালয়ৰ কোঠাৰ চেগুন কাঠৰ বেৰ আছিল সকলোৰে বাবে আকৰ্ষনৰ কেন্দ্ৰ ৷
ৰাজ্যৰ বহু চৰকাৰী বিষয়াৰ কোঠা এই আৰ্হিত নিৰ্মাণ কৰা হৈছে ৷ নগাঁৱৰ আয়ুক্তৰ চৰকাৰী কোঠাৰ চেগুনকাঠৰ কাৰুকাৰ্যই ৰাজ্যতে এক আভিজাত্য বহন কৰি আহিছে ৷ এই আভিজাত্যক নসাৎ কৰি বৰ্তমানৰ আয়ুক্ত নৰেন্দ্ৰ কুমাৰ শ্বাহে মইমতালিৰে সুন্দৰ হৈ থকা চেগুন কাঠ আঁতৰাই প্লাষ্টিক লগাইছে কোঠাৰ বেৰাত ৷
লোকনিৰ্মাণ বিভাগৰ গৃহ বিভাগৰ কাৰ্যবাহী অভিযন্তাৰ নেতৃত্বত এদল অভিযন্তাই চেগুন কাঠ আঁতৰাই প্লাষ্টিকেৰে সজালে আয়ুক্তৰ কোঠা ৷ কলকতাৰ পৰা অনা বিশেষ প্লাষ্টিকৰে কলকতাৰ মিস্ত্ৰীৰ দ্বাৰা নতুন বৰ্ষৰ পৰা ভালকৈ প্ৰশাসন চলাবলৈ আয়ুক্ত নৰেন্দ্ৰ কুমাৰ শ্বাহে কোঠা নিৰ্মাণ কৰোৱাই লোৱাক লৈ এতিয়া সৰ্বত্ৰে চৰ্চা ৷
নগাঁৱৰ আয়ুক্ত কাৰ্যালয়ত এতিয়া এখিলা কাগজক লৈ হাহাকাৰ অৱস্হা ৷ কোনো লোকে চৰকাৰী কামত কাৰ্যালয়লৈ গ’লে হাতত উকা কাগজ লৈ যাব লাগে ৷ ফটোষ্টেট কৰিবলৈকো বিকল মেচিনসমূহ ৷
সৰ্বসাধাৰণে কৰ্মচাৰীক নিজা খৰচত ফটোষ্টেট কৰাই দিয়ে ৷ কম্পিউটাৰৰ প্ৰিন্টাৰত প্ৰিন্ট দিবলৈ টনাৰত চিঞাহী নাথাকে ৷ এনে সন্ধিক্ষনত আয়ুক্ত নৰেন্দ্ৰ কুমাৰ শ্বাহে চৰকাৰী কাম কৰিবলৈ কাগজ , ফটোষ্টেটৰ ব্যৱস্থা, চিঞাঁহীৰ ব্যৱস্থা নকৰি মূল্যবান চেগুন কাঠ আঁতৰাই প্লাষ্টিকৰে কোঠাৰ বেৰা নিৰ্মাণ কৰি ধন শৰাধ কৰা ঘটনাক লৈ অসন্তোষ্ট নগাঁৱৰ আয়ুক্ত কাৰ্যালয়ৰ কৰ্মচাৰী ৷
আনকি আয়ুক্ত নৰেন্দ্ৰ কুমাৰ শ্বাহে কাৰ্যালয়ৰ কোঠাত নিজে নথকাৰ সময়ত আন কোন কোঠাত প্ৰবেশ কৰে নেকি সেই কথা জানিবলৈ কেমেৰাও সংস্থাপন কৰি লৈছে ৷
