ডিজিটেল সংবাদ, ধেমাজিঃ অসম চৰকাৰৰ মাতৃভাষা মাধ্যম বিৰোধী সিদ্ধান্ত বাতিলৰ দাবীত সদৌ অসম ছাত্ৰ সন্থাৰ আহবান মৰ্মে শনিবাৰে এক প্ৰতিবাদী কাৰ্যসূচী গ্ৰহণ কৰা হয় । পুৱা ১১ বজাৰ দুপৰীয়া ১২ বজাৰলৈকে এক ঘন্টাতকৈ অধিক সময় ধৰি ধেমাজি নগৰত ধেমাজি জিলা ছাত্ৰ সন্থাৰ তিনি শতাধিক কৰ্মীয়ে হাতে-হাতে ছাত্ৰ সন্থাৰ পতাকালৈ এক বিক্ষোভ কাৰ্য্যসূচী পালন কৰে ৷
ধেমাজি আঞ্চলিক ছাত্ৰ সন্থাৰ কাৰ্য্যালয়ৰ সমীপৰ পৰা ধেমাজি চাৰি আলিলৈকে ধেমাজি নগৰখনৰ ১৫ নম্বৰ ৰাষ্ট্ৰীয় ঘাইপথেৰে প্ৰতিবাদ কৰি বিজেপি চৰকাৰ হায় হায়, শিক্ষামন্ত্ৰী ৰনোজ পেগু কাম নাই , মুখ্যমন্ত্ৰী হিমন্ত বিশ্ব শৰ্মা হায় হায়, অসমীয়া মাধ্যম ধংস কৰিব বিচৰা কাৰ্য্য শীঘ্ৰে বন্ধ কৰক, সদৌ অসম ছাত্ৰ সন্থাৰ জিন্দাবাদ ধৱনিৰে উত্তাল কৰি তোলে ৷ কাৰ্য্যসূচীৰ অন্তত স্থলিতে এখনি প্ৰতিবাদী সভাও অনুষ্ঠিত হয় ৷
ধেমাজি জিলা ছাত্ৰ সন্থাৰ সম্পাদক জয়ন্ত বৰগোহাঁইয়ে আতঁ ধৰা প্ৰতিবাদী সভাত সদৌ অসম ছাত্ৰ সন্থাৰ কেন্দীয় কাৰ্য্যনিৰ্বাহকদ্বয় ৰবি কছাৰী , ৰাজীৱ গগৈ আৰু ধেমাজি জিলা ছাত্ৰ সন্থাৰ সভাপতি সঞ্জীৱ দাসে বক্তব্যত বিজেপি চৰকাৰখনে লোৱা মাতৃভাষা মাধ্যম বিৰোধী সিদ্ধান্তক তীব্ৰভাষাৰে গৰিহণা দি চৰকাখনৰ এনে কাৰ্য্যক সমালোচনা কৰে ৷
আজিৰ প্ৰতিবাদী সভাত ধেমাজি জিলা ছাত্ৰ সন্থাৰ উপদেষ্টা দিপক শৰ্মা , ছাত্ৰ সন্থাৰ কেন্দ্ৰীয় তথ্য সম্পাদক মন্টুৰাজ বৰুৱা, জিলা ছাত্ৰ সন্থাৰ সাংগঠনিক সম্পাদক কৰুণ জ্যোতি চেতিয়াকে ধৰি বহুকেইগৰাকী বিষয়াববীয়াই উপস্থিত থাকে ৷
