ডিজিটেল সংবাদ, মঙলদৈঃ চৰকাৰে চাৰিওফালে উন্নয়নৰ ধাকঢোল বজাই থকাৰ সময়তে দৰঙৰ ছিপাঝাৰ সমষ্টিৰ উত্তৰ কমাৰপাৰা আৰু দগিয়াপাৰা ৰাইজ সদায় বঞ্চিত হৈ আহিছে চৰকাৰী সুবিধাৰ পৰা ৷ প্ৰায় কুৰি বছৰে গাঁওখনলৈ অহা যোৱা কৰা একমাত্ৰ পথটিত পৰা নাই এচপৰাও মাটি ৷ সেয়ে গাঁওখনৰ ৰাইজে জৰাজীৰ্ণ পথটি মেৰামতি কৰিবলৈ সোমবাৰে ওলাই আহিল।
বিধায়ক পৰমানন্দ ৰাজবংশী আৰু সাংসদ দিলীপ শইকীয়াৰ ওপৰত ক্ষোভ এইসকল ৰাইজৰ ৷ বিগত ৫ বছৰত সাংসদগৰাকী গাঁওখনলৈ স্থলপথৰে নহয় বানপানীৰ সময়ত জলপথৰে এবাৰ মাত্ৰ আহিছিল গাঁওখনলৈ। সেয়ে ৰাইজে পথটি মেৰামতি কৰাই নহয় প্ৰায় ৪০০ ভোটাৰে ৰাজহুৱা সিদ্ধান্ত অনুসৰি ভোট বৰ্জনৰ সিদ্ধান্ত জনালে সংবাদ মাধ্যমক ৷ এইবাৰ লোকসভা নিৰ্বাচনত ভোট নিদিয়াৰ সিদ্ধান্ত এইসকল গঞাৰ।
