ডিজিটেল ডেস্ক : ভয়ংকৰ অৰ্থনৈতিক সংকটত পাকিস্তান । দেশ এখন সুকলমে চলাই নিবলৈ যি সুস্থিৰ অৰ্থনীতিৰ প্ৰয়োজন সেইয়া যেন বৰ্তমান নাই পাকিস্তানৰ । আন্ত:ৰাষ্ট্ৰীয় মুদ্ৰা নিধিৰ পৰিচালন সঞ্চালকেও আঙুলিয়াই দিলে সেই কথাকে । অতি শীঘ্ৰেই পাকিস্তানৰ অৰ্থনৈতিক অৱস্থাক সুস্থিৰ কৰি তোলাৰ নিৰ্দেশো দিলে আন্ত:ৰাষ্ট্ৰীয় মুদ্ৰা নিধিয়ে । অৱশ্যে পাকিস্তানৰ এই অৱস্থা সন্দৰ্ভত কেৱল সকিয়নিয়েই নহয় বৰং পৰামৰ্শও আগবঢ়ালে সংস্থাটোৱে ।
পাকিস্তানৰ যিসকলে লোকে ব্যক্তিগত অথবা চৰকাৰী খণ্ডত অধিক উপাৰ্জন কৰি আছে সেই সকল লোকে দেশলৈ অধিক অৱদান আগবঢ়াব পৰাকৈ আয়কৰ বৃদ্ধি কৰিবলৈ কৈছে সংস্থাটোৱে । আনহাতে, অপ্ৰয়োজনীয় লোকসকলৰ নাম হিতাধিকাৰী আচনি পৰা আতৰাই প্ৰকৃত প্ৰয়োজনীয় লোকসকলক হে আচনিৰ আওতালৈ আনিবও কোৱা হৈছে । এই ক্ষেত্ৰত সংস্থাটোৰ পৰিচালন সঞ্চালক গৰাকীৰ ভাষ্য অনুসৰি, তেওঁলোকে পাকিস্তানৰ আৰ্থিকভাৱে দুৰ্বল লোকসকলে কোনো অসুবিধা অনুভৱ নকৰাটোৱেই বিচাৰে ।
উল্লেখ্য যে, হিতাধিকাৰী আচনিৰ অপব্যৱহাৰ কেৱল পাকিস্তানতেই নহয় বৰং ভাৰততো হৈ আহিছে । তেনেস্থলত সময় থাকোতেই কঠোৰ নহ'লে অনতি পলমে হয়তো চুবুৰীয়া ৰাষ্ট্ৰসমূহৰ দৰে ভাৰততো দেখা দিব পাৰে অৰ্থনৈতিক সংকটে ।
