বিএছএফৰ মেঘালয়স্থিত কাৰ্যালয় ভ্ৰমণ সঞ্চালক প্ৰধানৰ

ডিজিটেল ডেস্কঃ ভাৰত-বাংলাদেশ সীমান্ত পৰিদৰ্শন সীমান্ত সুৰক্ষা বাহিনীৰ সঞ্চালক প্ৰধান আইপিএছ নিতিন আগৰৱালৰ। সীমান্তৰ বৰ্তমানৰ নিৰাপত্তা পৰিস্থিতি আৰু কাৰ্যকৰী প্ৰস্তুতিৰ পৰ্যালোচনাৰ বাবে ১৯ আৰু ২০ ছেপ্টেম্বৰত মেঘালয়ৰ সীমান্ত ভ্ৰমণ কৰিব সঞ্চালক প্ৰধানগৰাকীয়ে।

১৯ ছেপ্টেম্বৰত প্ৰথম দিনাৰ কাৰ্যসূচী মৰ্মে সঞ্চালক প্ৰধানগৰাকীক মেঘালয় বিএছএফৰ আইজি আইপিএছ প্ৰদীপ কুমাৰ আৰু অন্যান্য জ্যেষ্ঠ বিষয়াসকলে উম্পলিঙস্থিত বিএছএফৰ চৌহদত আদৰণি জনায়। আইজিগৰাকীয়ে মেঘালয়ৰ ভাৰত-বাংলাদেশ সীমান্তৰ সাধাৰণ নিৰাপত্তা পৰিস্থিতি আৰু কাৰ্যকৰী প্ৰস্তুতিৰ বিষয়ে ডিজিগৰাকীক অৱগত কৰে। তদুপৰি ভাৰত-বাংলাদেশ সীমান্তৰ প্ৰত্যাহ্বান আৰু প্ৰত্যাহ্বানৰ মোকাবিলাৰ বাবে লোৱা ব্যৱস্থাৰ বিষয়েও অৱগত কৰে।

ইয়াৰ পাছতেই ডিজিগৰাকীয়ে ফিল্ড কমাণ্ডাৰসকলৰ সৈতে বাৰ্তালাপ কৰি সীমান্ত সুৰক্ষিত কৰাৰ ক্ষেত্ৰত বিএছএফৰ জোৱানসকলে কৰা সমৰ্পণ আৰু ভাৰত-বাংলাদেশ সীমান্তত অপৰাধ নিয়ন্ত্ৰণৰ বাবে তেওঁলোকে কৰা প্ৰচেষ্টাক প্ৰশংসা কৰে। উল্লেখ্য যে, প্ৰথমদিনাৰ ভ্ৰমণকালত বিএছএফৰ ডিজিগৰাকীয়ে উম্পলিঙস্থিত বিএছএফ ফ্ৰণ্টিয়াৰৰ মুখ্য কাৰ্যালয়ৰ অফিচাৰ ইনষ্টিটিউটও উদ্বোধন কৰে।

Also Read: অসম আন্দোলনৰ নেতা-সমাজকৰ্মী যোগেশ শইকীয়াৰ দেহাৱসান