ডিজিটেল ডেস্কঃ কেন্দ্ৰীয় গৃহমন্ত্ৰী অমিত শ্বাহে মঙলবাৰে ঘোষণা কৰে যে চৰকাৰে ১,৬৪৩ কিলোমিটাৰ দীঘল ভাৰত-ম্যানমাৰ সীমান্তত বেৰ দিয়াৰ সিদ্ধান্ত গ্ৰহণ কৰিছে। এই পদক্ষেপে ভাৰত-ম্যানমাৰ সীমান্তত 'মুক্ত চলাচল' ব্যৱস্থা (এফএমআৰ)ত বাধা দিব।
এফ.এম.আৰ.-ৰ অধীনত ইণ্ডো-ম্যানমাৰ সীমান্তৰ ওচৰত বাস কৰা লোকসকলক কোনো নথিপত্ৰ অবিহনে দুয়োপাৰৰ ১৬ কিলোমিটাৰ পৰ্যন্ত যাত্ৰা কৰাৰ অনুমতি লাভ কৰে। ১,৬৪৩ কিলোমিটাৰ দীঘল ইণ্ডো-ম্যানমাৰ সীমান্তই মিজোৰাম, মণিপুৰ, নাগালেণ্ড আৰু অৰুণাচল প্ৰদেশ স্পৰ্শ কৰি যায়। এফএমআৰ ভাৰতৰ 'এক্ট ইষ্ট' নীতিৰ অংশ হিচাপে ২০১৮ চনত কাৰ্যকৰী কৰা হৈছিল।
ইম্ফল উপত্যকাস্থিত মেইটেই সকলে বেৰৰ জৰিয়তে সীমান্তত এনেধৰণৰ নিৰাপত্তাৰ দাবী প্ৰায়েই কৰি আহিছে। তেওঁলোকে অভিযোগ কৰে যে মুকলি সীমান্তৰ মাজেৰে বহু উগ্ৰপন্থী গোটেও ভাৰতত প্ৰৱেশ কৰে।
সামাজিক মাধ্যম এক্সৰ জৰিয়তে শ্বাহে কয় যে নৰেন্দ্ৰ মোডী চৰকাৰ সীমাক "অভেদ্য" কৰি তুলিবলৈ প্ৰতিশ্ৰুতিবদ্ধ। ১,৬৪৩ কিলোমিটাৰ দীঘল ভাৰত-ম্যানমাৰ সীমান্তত বেৰ দিয়াৰ সিদ্ধান্ত লোৱা হৈছে। উন্নত নিৰীক্ষণৰ বাবে সীমান্তত এটা টহলপথো সৃষ্টি কৰা হ'ব।
গৃহমন্ত্ৰীয়ে কয় যে মণিপুৰৰ মোৰেহত ১০ কিলোমিটাৰ দূৰত্বৰ সীমান্ত ইতিমধ্যে বেৰ দিয়া হৈছে। হাইব্ৰিড নিৰীক্ষণ প্ৰণালীৰ জৰিয়তে বেৰ দিয়াৰ দুটা পাইলট প্ৰকল্প ৰূপায়ণৰ কাম চলি আছে। বাকী ঠাইসমূহৰ কামো অতি শীঘ্ৰেই আৰম্ভ হ'ব বুলি তেওঁ কয়।
