ডিজিটেল সংবাদ মঙলদৈঃ অহা ২৬ এপ্ৰিলত ভোটগ্ৰহণ অনুষ্ঠিত হ'বলগীয়া দৰং জিলাৰ অন্তৰ্গত ৪৩ টা ভোটগ্ৰহণ কেন্দ্ৰলৈ বুধবাৰে আগতীয়াকৈ ৰাওনা হৈছে ভোটগ্ৰহণৰ দায়িত্বত নিয়োজিত প্ৰিজাইডিং-পোলিং বিষয়াৰ দল।জিলাখনৰ দূৰণিবটীয়া অঞ্চলত অৱস্থিত এই ভোটগ্ৰহণ কেন্দ্ৰসমূহলৈ যাতায়ত ব্যৱস্থা সূচল নোহোৱাৰ বাবেই জিলা প্ৰশাসনে ভোটগ্ৰহণৰ দায়িত্বত নিয়োজিত বিষয়া-কৰ্মচাৰীসকলক দুদিন আগতীয়াকৈ পঠিওৱাৰ ব্যৱস্থা কৰিছে।
উল্লেখ্য যে, অহা ২৬ এপ্ৰিলত দৰং-ওদালগুৰি সমষ্টিৰ অন্তৰ্গত দৰং জিলাত লোকসভা নিৰ্বাচনৰ ভোট গ্রহণ অনুষ্ঠিত হ'ব। তথ্য অনুসৰি, ৪৯ নং ছিপাঝাৰ বিধান সভা সমষ্টিৰ ১৪ টা, ৫০ নং মঙলদৈ বিধান সভা সমষ্টিৰ ৯ টা আৰু ৫১ নং দলগাওঁ বিধান সভা সমষ্টিৰ ২০ টা এনে ভোটগ্ৰহণ কেন্দ্ৰলৈ প্ৰিজাইডিং-পোলিং বিষয়াৰ দল আগতীয়াকৈ ৰাওনা হৈছে।
মঙলদৈ মহাবিদ্যালয়ত স্থাপন কৰা কাৰ্যালয়ৰ পৰা ভোটগ্ৰহণৰ প্ৰয়োজনীয় নথি-পত্ৰকে ধৰি সকলো সামগ্ৰী সংগ্ৰহ কৰি আজি ৪৩ টি দল নিজ নিজ ভোটগ্ৰহণ কেন্দ্ৰলৈ ৰাওনা হৈছে।
