মন্ত্ৰী-বিধায়ক নহয় ! বাছৰ চালক-যাত্ৰীক সম্বৰ্ধনা মেচাকি টঙানিত...

ডিজিটেল সংবাদ,চিলাপথাৰঃ এখন বাছৰ চালক আৰু যাত্ৰীক সম্বৰ্ধনা জনালে চিলাপথাৰৰ অন্তৰ্গত এখন গাঁৱৰ ৰাইজে। কেক কাটি আদৰণী জনোৱাৰ লগতে পিন্ধালে ভমকাফুলীয়া গামোচা। ধেমাজি জিলাৰ চিলাপথাৰ অঞ্চলৰ দুৰ্গম নৈপৰীয়া মেচাকি টঙানিত এসময়ত নাছিল কোনো ব্যৱহাৰৰ উপযোগী বাট-পথ।

বানেগৰকা চিচিটঙানী অঞ্চলৰ ৰাইজে টুলুঙা নাওঁ আৰু কলৰ ভূঁৰত চিলাপথাৰ, ধেমাজি আদিলৈ যাতায়ত কৰিবলগীয়া হৈছিল। শেহতীয়াকৈ ৫২ নং (খ ) কুলাজান-বগীবিল দলং পথৰ পৰা মেচাকী টঙানী হৈ মাজুলী লৈকে সম্পূৰ্ণ হৈ উঠিল পকী পথ। ফলত পথটোৰে শুভাৰম্ভ হ'ল যাত্ৰীবাহী বাছৰ চলাচল।

স্বাধীনতাৰ ৭৬ বছৰৰ পিছত পোন প্ৰথমবাৰৰ বাবে মঙলবাৰৰ পৰা অতিকৈ পিছপৰা মেচাকি টঙানি গাঁৱৰ মাজেদি মাজুলীৰ পৰা ডিব্ৰুগড় আৰু তিনিচুকীয়ালৈ আৰম্ভ হ'ল বাছৰ চলাচল।

 অঞ্চলটোত পোন প্ৰথমবাৰৰ বাবে 'পল ট্ৰেভেলচ' নামৰ যাত্ৰীবাহী বাছখন মেচাকি টঙানিত উপস্থিত হোৱাৰ লগে-লগে উৎফুল্লিত ৰাইজে পথত কলৰ পুলিৰে আদৰণি তোৰন স্থাপন কৰে। বাছখনৰ চালক আৰু যাত্ৰীক ফুলাম গামোচাৰে আদৰণি জনাই আনন্দ প্ৰকাশ কৰিলে ৰাইজে ।

 অনগ্ৰসৰ অঞ্চলটোত যাতায়াতৰ ক্ষেত্ৰত যুগান্তকাৰী পৰিবৰ্তন সাধন কৰা জোনাই সমষ্টিৰ বিধায়াক ভূৱন পেগুক কৃতজ্ঞতা জনালে গাঁওবাসীয়ে । ভূৱন পেগুৰ বাবেই এই অসাধ্য সাধন হোৱা বুলি জয়ধ্বনী দি বিধায়কজনক ভূয়সী প্ৰশংসা কৰি‌ দীৰ্ঘায়ু কামনা কৰিলে গাঁওবাসীয়ে।