ডিঙিলৈকে ধাৰ! দোপে দোপে বাঢ়িছে দৰিদ্ৰতাৰ হাৰ...

বিশ্ব বেংকৰ নতুন তথ্যই ভাৰত আৰু পাকিস্তানৰ অৰ্থনৈতিক অৱস্থাৰ তথ্য প্ৰকাশ কৰিছে। ভাৰতত কমিছে দৰিদ্ৰতা। আনহাতে দিনে দিনে সৰ্বহাৰা হৈছে পাকিস্তান। কিদৰে ঋণৰ ওপৰত চলিছে পাকিস্তানৰ অৰ্থনীতি পঢ়ক চয়নিকা শইকীয়াৰ এই প্ৰতিবেদনত...

দৰিদ্ৰতাৰ জীৱন কটাইছে পাকিস্তানে। মুদ্ৰাস্ফীতি আৰু দুৰ্বল অৰ্থনীতিৰ বোজাৰ সন্মুখীন হোৱা দেশখন ক্ৰমাগতভাৱে ঋণৰ বোকাত পোত খাইছে।  বিশ্ব বেংকৰ নতুন পৰিসংখ্যাই প্ৰকাশ কৰিছে ভাৰত আৰু পাকিস্তানৰ আৰ্থিক অৱস্থা। দৰিদ্ৰতা নিৰ্মুলৰ ক্ষেত্ৰত ভাৰত দ্ৰুতগতিত হ্ৰাস পোৱাৰ বিপৰীতে পাকিস্তানত দৰিদ্ৰতাই লৈছে ভয়ংকৰ ৰূপ। ২০১২ চনৰ পৰা ২০২২ চনৰ ভিতৰত ভাৰতত চৰম দৰিদ্ৰতা ২৭.১%ৰ পৰা ৫.৩%লৈ হ্ৰাস পাইছে।

এই সময়ছোৱাত ২৬.৯ কোটি লোক দৰিদ্ৰতাৰ পৰা মুক্ত হৈছে । ইয়াৰ বিপৰীতে ২০১৭ চনৰ পৰা ২০২১ চনৰ ভিতৰত পাকিস্তানত চৰম দৰিদ্ৰতা ৪.৯%ৰ পৰা ১৬.৫%লৈ বৃদ্ধি পাইছে। জাপানক এৰি ভাৰতৰ অৰ্থনীতি বিশ্বৰ চতুৰ্থ বৃহত্তম অৰ্থনীতি হিচাপে পৰিগণিত হৈছে। আনহাতে, পাকিস্তানৰ অৰ্থনীতিয়ে বাৰে বাৰে আই এম এফৰ পৰা বেইলআউট পেকেজ ল’বলগীয়া হৈছে

বিশ্ব বেংকৰ প্ৰতিবেদনত দৰিদ্ৰতা জুখিবলৈ নতুন স্কেল নিৰ্ধাৰণ কৰা হৈছে। এতিয়া প্ৰতিদিনে প্ৰতিজন ব্যক্তিৰ বাবে ৩ ডলাৰতকৈ কম উপাৰ্জন কৰা লোকসকলক ‘অতি দৰিদ্ৰ’ বুলি গণ্য কৰা হ’ব। এই নতুন পৰিসৰৰ পিছতো ভাৰতত দৰিদ্ৰতা হ্ৰাস পাইছে। ২০১২ চনৰ পৰা ২০২২ চনৰ ভিতৰত ভাৰতত চৰম দৰিদ্ৰতা ২৭.১%ৰ পৰা ৫.৩%লৈ হ্ৰাস পাইছে।

২০২২-২৩ চনত ভাৰতত ৭.৫২ কোটি লোকে চৰম দৰিদ্ৰতাত জীৱন কটাবলগীয়া হৈছিল। আনহাতে ২০১১-১২ চনত এই সংখ্যা আছিল ৩৪.৪৪ কোটি। অৰ্থাৎ ১১ বছৰত ২৬.৯ কোটি লোক দৰিদ্ৰতাৰ পৰা মুক্ত হ'ল। লক্ষ্যণীয় যে, পাকিস্তানৰ সমগ্ৰ জনসংখ্যাতকৈ এই সংখ্যা বেছি।

এই ক্ষেত্ৰত পাকিস্তানৰ পৰিস্থিতি সম্পূৰ্ণ বিপৰীত। ২০১৭ চনৰ পৰা ২০২১ চনৰ ভিতৰত চৰম দৰিদ্ৰতা ৪.৯%ৰ পৰা ১৬.৫%লৈ বৃদ্ধি পাইছে। বিশেষজ্ঞসকলে কয় যে, যদি আমি পাকিস্তানৰ পুৰণি তথ্য বিশ্লেষণ কৰো তেন্তে পৰিস্থিতি আৰু বেয়া হ’ব পাৰে। পাকিস্তানত ২০১৭ চনত প্ৰতিজন ব্যক্তিৰ বাবে প্ৰতিদিনে ৪.২ ডলাৰৰ কম উপাৰ্জন কৰা লোকৰ সংখ্যা আছিল ৩৯.৮%, যিটো ২০২১ চনত বৃদ্ধি পাই ৪৪.৭%তকৈ অধিক হৈছে।

উল্লেখ কৰা প্ৰয়োজন যে পাকিস্তানৰ অৰ্থনীতি সম্পূৰ্ণৰূপে ঋণৰ ওপৰত নিৰ্ভৰশীল। দেশখনে আই এম এফৰ পৰা ২৫টা বেইলআউট পেকেজ লৈছে, যাৰ মুঠ ধনৰাশি ৪৪.৫৭ বিলিয়ন ডলাৰ। ইয়াৰ উপৰিও বিশ্ব বেংক, এছিয়ান ডেভেলপমেণ্ট বেংক (এডিবি) আৰু ইছলামিক ডেভেলপমেণ্ট বেংকৰ পৰা ৩৮.৮ বিলিয়ন ডলাৰৰ ঋণ লাভ কৰিছে।

চীনৰ পৰা ২৫ বিলিয়ন ডলাৰতকৈ অধিক আৰু ইউৰোবণ্ড আৰু চুকুকৰ দৰে ঋণদাতাৰ পৰাও ৭.৮ বিলিয়ন ডলাৰৰ ঋণ লৈছে পাকিস্তানে। ছৌদি আৰব, সংযুক্ত আৰব আমিৰশ্বাহী (ইউ এ ই) আৰু পেৰিছ ক্লাবেও পাকিস্তানক কেইবা বিলিয়ন ডলাৰৰ ঋণ প্ৰদান কৰাৰ তথ্য পোহৰলৈ আহিছে।

ভাৰতত পাকিস্তানৰ প্ৰাক্তন উচ্চায়ুক্ত অজয় ​​বিছাৰিয়াই কয় যে, " ৰাজনীতি আৰু অৰ্থনীতিত পাকিস্তানী সেনাৰ হস্তক্ষেপ শেষ নোহোৱালৈকে বিশ্বই পাকিস্তানৰ সমস্যা সমাধান কৰিব নোৱাৰে। পাকিস্তানী সেনাই সম্পদ বিভাজন কৰে। গতিকে দ্বিপাক্ষিক বা বহুপক্ষীয় দাতাৰ পৰা পোৱা সকলো ধন সেনাই ব্যৱহাৰ কৰে আৰু ইয়াৰ সহায়ত সন্ত্ৰাসবাদী যন্ত্ৰ নিৰ্মাণ কৰা হয়। বেইলআউটৰ পৰা কেৱল পাকিস্তানী সেনাই ধনী হৈ উঠিছে।"

তেওঁ আৰু কয় যে, “বিশ্বই পাকিস্তানক দিয়া সাহায্যৰ ওপৰত নজৰ ৰাখিবলৈ এফ এ টি এফৰ দৰে কঠোৰ চৰ্ত আৰোপ কৰিব লাগে যাতে এই ধন উন্নয়ন আৰু পাকিস্তানৰ জনসাধাৰণৰ সুবিধাৰ বাবে ব্যৱহাৰ কৰা হয়।”

আচলতে পাকিস্তান চৰকাৰে উন্নয়নৰ ভুৱা দাবী কৰি আই এম এফ আৰু বিশ্ব বেংকৰ পৰা ঋণ লয় যদিও সেনা আৰু সন্ত্ৰাসবাদীৰ শক্তি বৃদ্ধি কৰা বাবে সেই ধন ব্যৱহাৰ কৰে। পাকিস্তান চৰকাৰৰ অগ্ৰাধিকাৰ উন্নয়ন নহয়, ভাৰত বিৰোধী আৰু সন্ত্ৰাসবাদী নেটৱৰ্ক শক্তিশালী কৰাহে। 

উল্লেখযোগ্য যে, বিশ্ব বেংকৰ প্ৰতিবেদন প্ৰকাশৰ লগে লগে পাকিস্তানৰ বাস্তৱতা উন্মোচিত হৈছে। বিশ্ব বেংকৰ পৰা ঋণ লোৱা সত্ত্বেও পাকিস্তানৰ পৰিস্থিতিৰ উন্নতি হোৱা নাই, পাকিস্তানত ক্ৰমবৰ্ধমান দৰিদ্ৰতাই তাৰ ইংগিত।