ডিজিটেল সংবাদ, শিৱসাগৰঃ ভাষা আন্দোলনৰ পৰা আৰম্ভ কৰি অসম আন্দোলনলৈকে অনেক জাতীয় আন্দোলন সমুখৰ পৰা নেতৃত্ব দিয়া প্ৰণৱজিৎ চলিহা ওৰফে ৰমু চলিহা আৰু নাই ৷ যোৱা কেইবাটাও দিন ধৰি অতি সংকটজনক অৱস্থাত থকা প্ৰণৱজিৎ চলিহাই বুধবাৰে বিয়লি ২.৪০ বজাত ডিব্ৰুগড়ৰ অসম মেডিকেল কলেজত মৃত্যুক আঁকোৱালি লয় হয় ৷
গুৰুতৰ ভাৱে অসুস্থ ক্ৰীড়াবিদ তথা ক্ৰীড়া সংগঠকগৰাকী যোৱা ১ ছেপ্টেম্বৰৰ পৰা ডিব্ৰুগড় অসম চিকিৎসা মহাবিদ্যালয়ত চিকিৎসাধীন হৈ আছিল ৷ ডিব্ৰুগড়ৰ অসম চিকিৎসা মহাবিদ্যালয়ৰ চিকিৎসকে দিনে নিশাই চিকিৎসা সেৱা আগবঢ়াইছিল যদিও এসময়ৰ শক্তিশালী ছাত্ৰনেতাগৰাকীয়ে শেষ নিশ্বাস ত্যাগ কৰে ৷ আপোচহীন সংগ্ৰামী নেতাগৰাকীক শ্বাস প্ৰশ্বাসজনিত অসুবিধাৰ বাবে পৰিয়ালৰ লোকে যোৱা ২০ আগষ্টত শিৱসাগৰ অসামৰিক চিকিৎসালয়ৰ আই চি ইউত ভৰ্তি কৰোৱাইছিল।
পৰৱৰ্তী পৰ্যায়ত ১ ছেপ্টেম্বৰত তেওঁক ডিব্ৰুগড় অসম চিকিৎসা মহাবিদ্যালয়লৈ নিয়া হৈছিল ৷ বিভিন্ন জাতীয় আন্দোলনত সিংহৰ দৰে গৰ্জন দি অসমবিৰোধী চক্ৰৰ বুকুত কঁপনি তুলিবলৈ সক্ষম হোৱা এই গৰাকী নেতাৰ মৃত্যুৰ বাতৰি বিয়পি পৰাৰ লগে লগেই সমগ্ৰ অসমত শোকৰ ছাঁ পৰে৷ তেওঁৰ নশ্বৰ দেহ ডিব্ৰুগড়ৰৰ পৰা শিৱসাগৰ ফুকন নগৰলৈ অনাৰ ব্যৱস্থা কৰা হৈছে ৷ জানিব পৰা অনুসৰি কাইলৈ তেওঁৰ শেষকৃত সম্পন্ন কৰা হ’ব ৷
