এম টি অ’ৰ এক লিটাৰ তেলেৰে সমগ্ৰ নিশা তহল দিয়ে নগাঁও আৰক্ষীয়ে...

এম টি অ’ৰ এক লিটাৰ তেলেৰে সমগ্ৰ নিশা তহল দিয়ে নগাঁও আৰক্ষীয়ে...
এম টি অ’ৰ এক লিটাৰ তেলেৰে সমগ্ৰ নিশা তহল দিয়ে নগাঁও আৰক্ষীয়ে...

ডিজিটেল সংবাদ নগাঁও : মধ্য অসমৰ এক গুৰুত্বপূৰ্ণ চহৰ নগাঁও ৷ চহৰখনত সংঘনে সংঘটিত হৈ আহিছে চুৰিৰ ঘটনা ৷ চোৰৰ উপদ্ৰপত এতিয়া নিদ্ৰাহৰণ হৈছে চহৰবাসীৰ ৷

চহৰবাসীক সুৰক্ষা প্ৰদানৰ বাবে নগাঁও আৰক্ষীয়ে দিনে নিশাই কাম কৰি আহিছে ৷ মাজে মধ্যে আৰক্ষীয়ে চোৰ কৰায়ত্ব কৰি আহিছে ৷ তাৰ মাজটো চোৰে নিৰ্বিবাদে চুৰি কাৰ্য চলাই যাবলৈ সক্ষম হৈছে ৷

নিশা পহৰা দিয়াৰ ক্ষেত্ৰত নগাঁও আৰক্ষী ব্যৰ্থ নেকি এই লৈ প্ৰশ্ন উঠিছে ৷ নিশা আৰক্ষীয়ে সঠিক ভাবে তহল নিদিয়ে নেকি ? এনে প্ৰশ্নৰ মাজতে তহলৰ ক্ষেত্ৰত আৰক্ষীৰ গাফিলতি থকাৰ চাঞ্চল্যকৰ ঘটনা পোহৰলৈ আহিছে ৷

আৰক্ষীৰ উচ্চ বিষয়াক অন্ধকাৰত ৰাখি এজন এছ আইয়ে চলোৱা কাণ্ডৰ বাবে নগাঁও চহৰত নিশা আৰক্ষীৰ টহলত গাফিলতি পোহৰলৈ আহিছে ৷ জানিব পৰা মতে নগাঁও চহৰত নিশা টহলৰ বাবে মটৰ চাইকেলত উঠি চহৰখনত পৰিভ্ৰমণ কৰে আৰক্ষীয়ে ৷

চাঞ্চল্যকৰ বিষয় এয়ে যে ৰাতি মটৰ চাইকেলত টহল দিবলৈ এম টি অ’ ৰ দায়িত্ব থকা এছ আই নয়ন নেৱাৰে পেট্ৰ'ল দিয়ে মাত্ৰ এক লিটাৰকৈ ৷ নিশাৰ পৰা পুৱালৈকে এক লিটাৰ তেল ভৰাই বৃহত্তৰ নগাঁও চহৰত টহল দিয়ে আৰক্ষীয়ে ৷

জানিব পৰা মতে ৮ জন আৰক্ষীয়ে নিশা চাৰিখন মটৰ চাইকেলত সমগ্ৰ নগাঁও চহৰ টহল দিব লাগে ৷ চাৰিখন মটৰ চাইকেলত চাৰিলিটাৰ পেট্ৰল ভৰাই কি দৰে আৰক্ষীয়ে তহল দিয়ে সেই কথা এক অবুজ সাথৰ ৷

প্ৰতিমাহত ২৫ লাখৰ পৰা ৩০ লাখ টকাৰ বিল প্ৰস্তুত কৰা এম টি অ’ নয়ন নেৱাৰে কিয় নিশা টহল দিব লগা আৰক্ষীক এক লিটাৰকৈ পেট্ৰল দিয়ে ই ৰহস্যজনক ৷ তেলৰ অভাবত নিশা কৰ্তব্যত নিয়োজিত আৰক্ষীয়ে তহল দিব নোৱাৰে ৷

সেয়ে নিশা ৰাইজেও তহলদাৰী আৰক্ষীকো বিপদৰ ক্ষণত তাৎক্ষণিক ভাবে সাক্ষাত নাপায় ৷ নিশা আৰক্ষীৰ নিৰ্লিপ্ততাৰ পূৰ্ণ সুযোগ সেয়ে গ্ৰহণ কৰিবলৈ সক্ষম হৈছে চোৰে৷

একেদৰে চহৰখনত তিনিখনকৈ টাউন পহৰা চকী আছে ৷ এই পহৰা চকী কেইখন হৈছে ইটাচালি , মৰিকলঙ আৰু হয়বৰগাঁও টাউন আৰক্ষীচকী ৷ তিনিওখন টাউন পহৰা চকীয়ে নিশা নিজা নিজা এলেকাত টহলৰ বাবে আৰক্ষীক দায়িত্ব ন্যস্ত কৰে ৷

কিন্তু এম টি অ’ নেৱাৰে টহলৰ বাবে তিনিখন চাৰিচকীয়া গাড়ীৰ বাবে পৰ্যাপ্ত তেলৰ যোগান নিদিয়ে ৷ টহলৰ বাবে নিশা তিনি টাউন আৰক্ষী চকীয়ে তিনিখন গাড়ী লৈ ওলায় যদিও পথত নিশা মদ্যপান কৰা দুই এক লোকক ধৰি থানালে লৈ আহে ৷

আবকাৰীক গতাই নিদি মদ্যপায়ীক নিশাই বা পুৱা এৰি দি নিশাৰ তহলৰ দায়িত্ব পালন কৰি আহিছে চহৰৰ তিনি টাউন আৰক্ষী চকীয়ে ৷ ইয়াৰ বাহিৰেও নগাঁও সদৰ থানাৰ টাউন শাখাই চোৰ ধৰাতকৈ নিশা মদ্যপায়ীক আটক কৰাত ৰেকৰ্ড কৰি আহিছে ৷ শাখাৰ চি চি কেমেৰাই তাৰ প্ৰমান দিব ৷

প্ৰশ্ন হৈছে চহৰবাসীৰ নিৰাপত্তাৰ বাবে চৰকাৰে যোগান ধৰা তেলৰ ধন এম টি অ’ নয়ন নেৱাৰে ক’ত খৰছ কৰে ? প্ৰতিমাহে ২৫ ৰ পৰা ৩০ লাখ টকাৰ তেল বিল কেনেদৰে প্ৰস্তুত কৰে ? এই লৈ এতিয়া নগাঁও আৰক্ষীৰ মাজতে গুনাগঠা ৷

Related Stories

No stories found.
Asomiya Pratidin
www.asomiyapratidin.in