কাজিৰঙাত হাতত ঝাড়ু তুলি ল’লে মন্ত্ৰী অতুল বৰাই

ডিজিটেল সংবাদ, কাজিৰঙাঃ ৰাজ্যৰ একাংশ চৰকাৰী বিভাগৰ বৰমূৰীয়াসকল কিমান বেছি অলগৰ্ধ সেয়া আজি পোনচাটেই স্বীকাৰ কৰে ৰাজ্যৰ কৃষিমন্ত্ৰী তথা বোকাখাতৰ স্থানীয় বিধায়ক অতুল বৰাই ৷ আনকি, এটা চৰকাৰী বিভাগৰ উদাসীনতাত খৰ্গহস্ত হৈ কাজিৰঙাত হাতত ঝাড়ু পৰ্যন্ত তুলি ল’লে মন্ত্ৰী বৰাই ৷

উল্লেখ্য যে আজি ৰাজ্যৰ বনবিভাগ-জিলা প্ৰশাসন-আৰক্ষীৰ স’তে এক গুৰুত্বপূৰ্ণ বৈঠকত মিলিত হ’বৰ বাবে দুপৰীয়া কাজিৰঙা বনবিভাগৰ সভাকক্ষৰ সন্মুখত উপস্থিত হয় মন্ত্ৰীগৰাকী ৷ লগত উপস্থিত থাকে ৰাজ্যৰ প্ৰধান মুখ্য বন সংৰক্ষক এম কে যাদৱ, বনবিভাগৰ উচ্চ পদস্থ বিষয়াসকলৰ লগতে গোলাঘাটৰ উপায়ুক্ত পি উদয় প্ৰবীণ ৷

বনবিভাগৰ সভাকক্ষৰ সন্মুখত মন্ত্ৰীগৰাকীয়ে দেখা পায় এটা জাবৰৰ দ’ম ৷ লক্ষণীয় কথাটো হ’ল যে জাবৰৰ দ’ম হৈ থকা স্থানত যোৱা ২৫ ডিচেম্বৰৰ পৰা ১১ জানুৱাৰী পৰ্যন্ত ৰাজ্যৰ হস্ততাঁত আৰু বস্ত্ৰ শিল্পৰ এখনি মেলা বিভাগটোৱে চৰকাৰীভাৱে অনুষ্ঠিত কৰিছিল ৷ মেলাও শেষ, চৰকাৰী লোকসকল গৈ ঘৰ পালেগৈ ৷

কিন্তু, ঠাইডোখৰ চাফা নহ’ল ৷ আনকি, উক্ত স্থানত পৰি ৰোৱা গজালে ইতিমধ্যেই পাঁচখন মান গাড়ীৰ চকা ফুটালে ৷ এই সামগ্ৰিক দৃশ্য দেখা পাই লগে লগে ঝাড়ু তুলি ল’লে মন্ত্ৰী বৰাৰ লগতে এম কে যাদৱে ৷

আনহাতে, ফোনযোগে ককৰ্থনাও কৰিলে জাবৰৰ দ’ম কৰি যোৱা সংশ্লিষ্ট বিভাগটোৰ বৰমূৰীয়াক ৷ কাইলৈৰ ভিতৰত সমগ্ৰ এলেকাটো ঘেৰি থ’বলৈয়ো কাজিৰঙা বনবিভাগক নিৰ্দেশ দিয়ে ৷ গুৰুত্বপূৰ্ণ কথাটো হ’ল, সম্প্ৰতি জাবৰৰ দ’মত পৰিণত হৈছে কাজিৰঙাৰ কহঁৰা চাৰিআলি ৷ কিন্তু, চৰকাৰী-বেচৰকাৰী কোনো পক্ষৰে যেন আহৰি নাই পৰ্যটনথলীখনি চাফা কৰি ৰখাৰ ৷

আৰু পঢ়কঃ ডবকাত ভয়ংকৰ পথ দুৰ্ঘটনা