চিচিবৰগাঁৱৰ যৌন নিৰ্যাতন কাণ্ডৰে জড়িতক গ্ৰেপ্তাৰৰ দাবীত স্মাৰক পত্ৰ..

ডিজিটেল সংবাদ,চিলাপথাৰঃ পহিলা জানুৱাৰীৰ দিনাই চিচিবৰগাঁৱত সংঘটিত হৈছিল এক জঘন্য ঘটনা । দিন দুপৰতে তিনিটা লম্পটৰ কামনাৰ বলি হৈছিল এগৰাকী দৰিদ্ৰ মহিলা। উল্লেখযোগ্য যে যৌন নিৰ্যাতন চলায় মুমুৰ্ষু অৱস্থাত পেলাই থৈ গৈছিল নদীৰ পাৰত ।

ঘটনাৰ লগত জড়িত চুমনি গাঁৱৰ এজন যুবকক আটক কৰি আৰক্ষীয়ে ন্যায়িক জিম্মালৈ প্ৰেৰণ কৰিছে। পিছে ঘটনাৰ চাৰিটা দিনৰ পিছতো আৰক্ষীৰ হাতত পৰা নাই আন দুটা অভিযুক্ত। বৰ্তমান আটকাধীন যুবকজনে তেওঁৰ লগত আৰু দুজন যুৱক আছিল বুলি স্বীকাৰ কৰিছে যদিও বৰ্তমানলৈকে তেওঁলোক কোন তাৰ কোনো শুংসূত্ৰ উলিয়াব পৰা নাই। 

ভুক্তভোগী মহিলাগৰাকী বৰ্তমানেও ধেমাজি অসামৰিক চিকিৎসালয়ত চিকিৎসাধীন হৈ আছে । ঘটনা সন্দৰ্ভত আজি সংবাদ মাধ্যমৰ আগত প্ৰতিক্ৰিয়া প্ৰকাশ কৰি ধেমাজি জিলা জাতীয় মহিলা পৰিষদৰ সদস্যাসকলে বাকী থকা অপৰাধী কেইজনক শীঘ্ৰে কৰায়ত্ব কৰি উচিত শাস্তি প্ৰদান কৰাৰ দাবী জনায়। 

ভুক্তভোগী মহিলাগৰাকীৰ ঘৰত এক প্ৰতিবাদী সভাৰ আহ্বান কৰি দোষীক শীঘ্ৰে কৰায়ত্ব কৰি কঠোৰ শাস্তিৰ দাবী জনাই চিচিবৰগাঁও ৰাজহ চক্ৰৰ কাৰ্যালয়ত এক স্মাৰক পত্ৰ প্ৰদান কৰে ধেমাজি জিলা জাতীয় মহিলা পৰিষদে ।