ব্ৰহ্মপুত্ৰৰ গৰাখহনীয়াৰ স্থায়ী সমাধানৰ দাবীৰে হাটশিঙিমাৰীত জিলা কংগ্ৰেছৰ অনিৰ্দিষ্টকালীন অৱস্থান ধৰ্মঘট

ডিজিটেল সংবাদ দক্ষিণ শালমাৰঃ মানকাচৰৰ ভাৰত-বাংলাদেশ সীমান্তৱৰ্তী কোকৰাডাঙা, কালাইৰ আলগাকে ধৰি জিলাখনৰ বিভিন্ন প্ৰান্তত বৰলুইতৰ খহনীয়াই ভয়ংকৰ ৰূপ ধাৰণ কৰিছে। বিশেষকৈ আন্তঃৰাষ্ট্ৰীয় সীমান্তৱৰ্তী কোকৰাডাঙাত চলি থকা খহনীয়াই সীমান্ত সংযোগী পথৰ লগতে কাইটীয়া তাঁৰৰ বেৰৰ প্ৰতি ভাবুকি আহিছে। 

জিলাবাসীয়ে খহনীয়াৰ স্থায়ী প্ৰতিৰোধৰ দাবী জনাই অহাৰ পাছতো জিলা প্ৰশাসন, চৰকাৰে গুৰুত্ব নিদিয়াৰ ফলত আজি দক্ষিণ শালমাৰা-মানকাচৰ জিলা কংগ্ৰেছৰ পৰা অনিৰ্দিষ্টকালীন অৱস্থান ধৰ্মঘট কাৰ্যসূচী হাতত লোৱা হৈছে। কংগ্ৰেছৰ জিলা সভাপতি তথা মানকাচৰৰ প্ৰাক্তন বিধায়ক ডাঃ মতিউৰ ৰহমান মণ্ডলৰ নেতৃত্বত শতাধিক কংগ্ৰেছ কৰ্মী আজি পুৱা ১০ বজাত হাটশিঙিমাৰী বাছ আস্থানত অনিৰ্দিষ্টকালীন অৱস্থান ধৰ্মঘট কাৰ্যসূচী আৰম্ভ কৰে। 

জিলা আয়ুক্তৰ কাৰ্যালয়ৰ পৰা প্ৰায় ১৫০ মিটাৰ নিলগত থকা হাটশিঙিমাৰী বাছ আস্থানত পুৱাৰে পৰা প্ৰতিবাদকাৰীসকলে হাতে হাতে প্লে’কাৰ্ড লৈ বিভিন্ন শ্লোগানেৰে ধৰ্মঘটস্থালীৰ পৰিবেশ উত্তাল কৰি তোলাৰ পাছতো সন্ধিয়া ৮ বজালৈ জিলা প্ৰশাসন বা চৰকাৰৰ পৰা কোনো ধৰণৰ সহাৰি অহা নাই। জিলা কংগ্ৰেছৰ সভাপতি ডাঃ মতিউৰ ৰহমান মণ্ডল, পুত্ৰ মহিবুৰ ৰহমান মণ্ডল সহ কংগ্ৰেছ কৰ্মীসকলে দিনজুৰি ধৰ্মঘটস্থালীত অৱস্থান কৰি আছে।

চৰকাৰ বা জিলা প্ৰশাসনে মানকাচৰৰ হাজিৰহাট এলেকাৰ পৰা বাংলাদেশ সীমান্তৱৰ্তী কালাইৰ আলগালৈ হৈ থকা খহনীয়াৰ স্থায়ী প্ৰতিৰোধৰ বাবে যেতিয়ালৈ আশ্বাস প্ৰদান নকৰে তেতিয়ালৈ জিলা কংগ্ৰেছে এই অনিৰ্দিষ্টকালীন অৱস্থান ধৰ্মঘট কাৰ্যসূচী চলাই যাব বুলি জিলা সভাপতি ডাঃ মতিউৰ ৰহমান মণ্ডল আৰু পুত্ৰ মহিবুৰ ৰহমান মণ্ডলে সংবাদিকৰ আগত মত প্ৰকাশ কৰিছে। 

লক্ষণীয় যে, বিগত প্ৰায় তিনি সপ্তাহ ধৰি জিলাখনৰ বিভিন্ন প্ৰান্তৰ লগতে বাংলাদেশ সীমান্তৱৰ্তী কোকৰাডাঙাত বৰলুইতৰ খহনীয়াই ভয়ংকৰ ৰূপ ধাৰণ কৰিছে। কোকৰাডাঙাত ইতিমধ্যে কেবাটাও পৰিয়ালৰ ঘৰ-বাৰী খহনীয়াৰ কৱলত পৰি নিৰাপদ স্থানত স্থানান্তৰ কৰিবলগীয়া হৈছে। শ শ বিঘা কৃষি ভূমি ইতিমধ্যে খহনীয়াত জাহ যোৱাৰ ফলত ব্ৰহ্মপুত্ৰ সীমান্ত সংযোগী পথৰ কাষ চাপিছে। 

ব্ৰহ্মপুত্ৰৰ পাৰ খহি খহি জিলাৰ সদৰ হাটশিঙিমাৰীৰ পৰা বাংলাদেশ সীমান্তলৈ যোৱা সীমান্ত সংযোগী পথৰ পৰা প্ৰায় ২০ মিটাৰ ওচৰ পাইছেগৈ। যিকোনো মুহূৰ্তত খহনীয়া বৃদ্ধি পালে সীমান্ত সংযোগী পথটো ছিঙি যাব পাৰে। সীমান্ত সংযোগী পথ ছিঙিলে জিলাখনৰ পশ্চিম প্ৰান্তত থকা সীমান্তৰ কাইটীয়া তাঁৰৰ বেৰৰ ব্ৰহ্মপুত্ৰৰ সিপাৰে পৰিব।

লগতে সীমান্তৱৰ্তী বহু কেইখন গাঁও জলমগ্ন হৈ বিশেষকৈ কেবা হেজাৰ কৃষক ক্ষতিগ্ৰস্ত হ’ব। তদুপৰি সীমান্তৰ কাইটীয়া তাঁৰৰ বেৰো ব্ৰহ্মপুত্ৰৰৰ বুকুত জাহ যোৱাৰ সম্ভাৱনা আছে। এনে হ’লে প্ৰায় ৩৫ বছৰ পূৰ্বে সীমান্তত নিৰ্মাণ কৰা কাইটীয়া তাঁৰৰ বেৰ পুনৰ উন্মুক্ত হৈ পৰিব। 

লক্ষণীয় যে, সীমান্ত উন্মুক্ত থকাৰ সময়ত বাংলাদেশী ডকাইত, চোৰ, দুষ্কৃতিকাৰী নিশা মানকাচৰৰ বিভিন্ন লোকৰ ঘৰত প্ৰৱেশ কৰি লুট-পাট অত্যাচাৰ চলাই নিশাটোৰ ভিতৰতে বাংলাদেশলৈ উভতি গৈছিল। বাংলাদেশী দুষ্কৃতিকাৰীৰ সন্ত্ৰাসত জিলাবাসীৰ নিদ্ৰা হৰণ হৈ পৰিছিল। কিন্তু সীমান্তত কটকটীয়াকৈ কাইটীয়া তাঁৰৰ বেৰ নিৰ্মাণৰ কৰাৰ পাচত জিলাখনত বাংলাদেশীৰ সন্ত্ৰাস লুপ্ত হৈছে যদিও পুনৰ খহনীয়াৰ ফলত সীমান্ত উন্মুক্ত হ’লে বাংলাদেশী দুষ্কৃতিকাৰীয়ে পুনৰ সীমান্তৱৰ্তী মানকাচৰৰ বিভিন্ন গাঁৱত অত্যাচাৰ চলাব নেকি তাকে লৈ বিভিন্ন জনৰ মাজত প্ৰশ্নৰ উদয় হৈছে। 

সীমান্ত উন্মুক্ত হ’লে দেশৰ নিৰাপত্তাৰ প্ৰতি চৰম ভাবুকি আহিব। কিয়নো এটা সময়ত বাংলাদেশ ভাৰতৰ বাবে বন্ধু ৰাষ্ট্ৰ আছিল যদিও বৰ্তমান শ্বেইখ হাছিনা চৰকাৰৰ পতনৰ পাছত দেশ এৰি পলায়ন কৰি হাছিনাই ভাৰতত আশ্ৰয় লোৱাৰ পাছৰে পৰা বাংলাদেশৰ বাবে ভাৰত শত্ৰু হৈ পৰিছে। 

ভাৰত চৰকাৰে বিষয়টো অতি গুৰুত্ব সহকাৰে লৈ মানকাচৰ-বাংলাদেশ সীমান্তৰ খহনীয়াৰ স্থায়ী প্ৰতিৰোধ কৰাটো অতিকৈ জৰুৰী হৈ পৰিছে। কিন্তু চৰকাৰে মানকাচৰৰ সীমান্তৰ খহনীয়াৰ প্ৰতি স্থায়ী প্ৰতিৰোধৰ বাবে কোনো ব্যৱস্থা গ্ৰহণ নকৰাত আজি এইদৰে জিলা কংগ্ৰেছৰ পৰা অনিৰ্দিষ্টকালীন অৱস্থান ধৰ্মঘটৰ কাৰ্যসূচী হাতত ল’বলগীয়া হৈছে।

মন কৰিবলগীয়া বিষয় এয়া যে, জিলা কংগ্ৰেছৰ প্ৰতিবাদকাৰীসকলে হাতে হাতে প্লে’কাৰ্ড লৈ অসম চৰকাৰ হায় হায়, বিজেপি চৰকাৰ মুৰ্দাবাদা, জিলা প্ৰশাসন হায় হায়, মন্ত্ৰী পীযুষ হাজৰীকা হায় হায়, খহনীয়াৰ স্থায়ী প্ৰতিৰোধৰ ব্যৱস্থা কৰক, হাজিৰহাটাৰ পৰা সীমান্তৱৰ্তী কালাইৰ আলগালৈ স্থায়ী প্ৰতিৰোধৰ ব্যৱস্থা কৰক আদি শ্লোগানেৰে উত্তাল প্ৰতিবাদ অব্যাহত ৰাখিছে।

স্মৰ্তব্য যে, সম জিলা সম উন্নয়নৰ পৰিকল্পনা কৰি মুখ্যমন্ত্ৰী হিমন্ত বিশ্ব শৰ্মা মানকাচৰলৈ প্ৰতিটো বিভাগৰ প্ৰতিগৰাকী মন্ত্ৰীৰ লগতে উচ্চ পদস্ত বিষয়াসকলক পৰিদৰ্শনৰ নিৰ্দেশনা প্ৰদান কৰিছে। ইতিমধ্যে জিলাখনত মাত্ৰ ডেৰ মাহৰ ভিতৰত কেবাগৰাকী মন্ত্ৰী আৰু উচ্চ পদস্ত বিষয়াসকল উপস্থিত হৈ বিভিন্ন চৰকাৰী আঁচনি পৰিদৰ্শনৰ লগতে জিলাখনৰ সমস্যা সমাধানৰ বাবে জিলা প্ৰশাসন আৰু বিভিন্ন বিভাগৰ মুৰব্বী বিষয়াসকলৰ সৈতে পৰ্যালোচনা সভা অনুষ্ঠিত কৰি মুখ্যমন্ত্ৰীলৈ প্ৰতিবেদন দাখিল কৰা বুলি জানিব পৰা গৈছে। 

দুই চাৰিদিনৰ ভিতৰত জলসম্পদ মন্ত্ৰী পীযুষ হাজৰীকাও জিলাখনলৈ আহিব বুলি জিলা প্ৰশাসনৰ পৰা জানিব পৰা গৈছে। সকলো মন্ত্ৰী আৰু উচ্চ পদস্ত বিষয়াসকল জিলাখন পৰিদৰ্শনৰ পাছত প্ৰতিবেদন মুখ্যমন্ত্ৰীলৈ দিয়াৰ পাছত মুখ্যমন্ত্ৰীয়ে নিজে জিলাখনত আহি সমস্যা সমাধান কৰি জিলাখন ৰাজ্যৰ আন জিলাৰ সৈতে সম উন্নয়ন কৰিব বুলি আশা কৰা হৈছে।

কিন্তু ডেৰ মাহ ধৰি জিলাখনত মন্ত্ৰীৰ আহ-যাহ থকাৰ পাছতো এতিয়ালৈ সীমান্তৱৰ্তী কোকৰাডাঙাত খহনীয়াৰ স্থায়ী প্ৰতিৰোধৰ বাবে কোনো ব্যৱস্থা চৰকাৰে কিয় গ্ৰহণ কৰা নাই তাক লৈ প্ৰাক্তন বিধায়ক ডাঃ মতিউৰ ৰহমান মণ্ডলৰ পুত্ৰ মহিবুৰ ৰহমান মণ্ডল প্ৰশ্ন উত্থাপন কৰিছে।