উৰিয়ামঘাটৰ উচ্ছেদিত স্থান পৰিদৰ্শন মুখ্যমন্ত্ৰী ড০ হিমন্ত বিশ্ব শৰ্মাৰ

ডিজিটেল সংবাদ,গোলাঘাট : গোলাঘাট জিলাৰ অন্তগৰ্ত অসম-নগালেণ্ড সীমান্তবৰ্তী ৰেংমা সংৰক্ষিত বনাঞ্চলত অবৈধভাৱে বসবাস কৰি থকা একাংশ সন্দেহজনক নাগৰিকৰ প্ৰায় ১১ হেজাৰ বিঘা  বনভূমি উচ্ছেদ কৰিবৰ বাবে বনবিভাগে পাঁচদিনৰ সময়সীমা বান্ধি দি ইতিমধ্যে পৰিয়ালসমূহলৈ জাননী প্ৰেৰণ কৰিছে ৷ এই জাননী লাভ কৰাৰ পিছৰেপৰা আৰু মাত্ৰ দুটাদিন বাকী থকা অৱস্থাত অঞ্চলটোৰ পৰা নিতৌ শতাধিক গাড়ী-মটৰত প্ৰায় ৭০%  পৰিয়ালে নিজৰ নিজৰ ঘৰৰ সা-সামগ্ৰীসমূহ লৈ ৰাজ্যখনৰ বিভিন্ন জিলালৈ আঁতৰি গৈছে ৷

ইফাল শুকুৰবাৰে উচ্ছেদ হ’বলগীয়া দয়ালপুৰ, মধুপুৰ, খেৰবাৰী , পিঠাঘাট আদি গাঁওসমূহ পৰিদৰ্শন কৰি বৃহৎ বৃহৎ তামোলৰবাৰীসমূহ প্ৰত্যক্ষ কৰি মুখ্যমন্ত্ৰীগৰাকীয়ে আশ্চৰ্য প্ৰকাশ কৰে ৷  উচ্ছেদ হ’বলগীয়াস্থান সমূহ পৰিদৰ্শন কালত মুখ্যমন্ত্ৰীগৰাকীয়ে সাংবাদিকককয় যে , অঞ্চলটোত একো একোজন বেদখলকাৰীয়ে বৃহৎ বৃহৎ পৰিমানৰ ভূমি অধিগ্ৰহণ কৰি তামোলবাৰীৰ লগতে অন্যান্য কাৰ্যত ব্যৱহাৰ কৰি এক আৰ্থিক কেন্দ্ৰ ৰূপে গঢ়ি তুলিছে ৷ চৰকাৰে এই ক্ষেত্ৰত নিৰৱে থাকিব নোৱাৰে ৷

ৰেংমা সংৰক্ষিত বনাঞ্চলত ৰাজ্যখনৰ উপৰিও বহিৰাজ্যৰ পৰাও বহু লোক আহি বেদখল কৰিছেহি ৷ উচ্ছেদকৰণৰ ক্ষেত্ৰত মুখ্যমন্ত্ৰীগৰাকীয়ে ৰাইজৰ পৰাও সহযোগিতা বিচাৰে ৷

উল্লেখ্য যে আজি দিনৰ প্ৰায়  ডেৰ বজাত অসম-নগালেণ্ড সীমান্তৰ বিদ্যাপুৰ খেলপথাৰত ডিব্ৰুগড়ৰ পৰা আহি হেলিকপ্টাৰত অৱতাৰণ কৰে ৷ ইফালে প্ৰখৰ ৰ’দকে নেওচি মুখ্যমন্ত্ৰীগৰাকীক কাষৰ পৰা প্ৰত্যক্ষ কৰিবৰ বাবে সহস্ৰাধিক দৰ্শকে ভীৰ কৰেহি ৷

অসম-নগাৰাজ্যৰ একেবাৰে প্ৰান্তীয় অঞ্চলটোলৈ অহা প্ৰথমগৰাকী মুখ্যমন্ত্ৰী হিচাপে পৰিগণিত হোৱা মুখ্যমন্ত্ৰীগৰাকীক বহু কেইটা দল-সংগঠণে  আদৰণি জনায় ৷ মন কৰিবলগীয়া যে আজিৰ উৎকট গৰমৰ বতৰত হঠাৎ অহা এজাক বৰষুণে মুখ্যমন্ত্ৰীগৰাকীক দৰ্শন পাবৰ বাবে অপেক্ষাৰত  ৰাইজক কিছু পৰিমাণে সকাহ দিয়ে ।