ডিজিটেল সংবাদ, মেৰাপানীঃ চাকৰি প্ৰদানৰ নামত গুৱাহাটীৰ এটা ভুৱা বিত্তীয় প্ৰতিষ্ঠানে লুটিছে নিবনুৱা যুৱক-যুৱতীৰ পৰা লাখ লাখ টকা। গুৱাহাটীৰ ছয়মাইলস্থিত চলিউশ্যন চাৰ্ভিচ নামৰ বিত্তীয় প্ৰতিষ্ঠানটোৱে ১০০ শতাংশ গেৰাণ্টিসহ ভাৰতীয় ডাক বিভাগৰ নামত বিজ্ঞাপন প্ৰকাশ কৰি নিবনুৱা যুৱক-যুৱতীৰ পৰা লাখে লাখে টকা সৰকালে।
ইফালে মেৰাপানীৰ কেইবাগৰাকী ছাত্ৰ-ছাত্ৰীৰ পৰা বন্ধন বেংকত চাকৰিৰ বিজ্ঞাপন প্ৰকাশ কৰি ৫০০ টকা সংগ্ৰহ কৰাৰ অভিযোগ উত্থাপন হৈছে কোম্পানীটোৰ বিৰুদ্ধে। ঘটনাৰ সন্দৰ্ভত ছাত্ৰ-ছাত্ৰীসকলৰ মাজত সন্দেহ ওপজাত স্থানীয় ডাকঘৰত খবৰ কৰাতহে সমগ্ৰ ঘটনাটো ভুৱা বুলি পোহৰলৈ আহে।
উল্লেখযোগ্য যে বিত্তীয় প্ৰতিষ্ঠানটোৱে ৪০ দিনৰ ভিতৰত চাকৰি নহ'লে পইচা ঘূৰাই দিয়াৰ প্ৰতিশ্ৰুতি দি দুখীয়া-দৰিদ্ৰ নিবনুৱা ছাত্ৰ-ছাত্ৰীৰ পৰা এনেদৰে ধন সংগ্ৰহ কৰাক লৈ মেৰাপানীত তীব্ৰ প্ৰতিক্ৰিয়াৰ সৃষ্টি হৈছে।
