ডিজিটেল ডেস্ক: বিগত কেইবামাহ ধৰি বলীউডৰ প্ৰখ্যাত বচ্চন পৰিয়ালটো খুব চৰ্চাত আছে।এই চৰ্চাৰ কাৰণ হ'ল পৰিয়ালকেন্দ্ৰিক সংঘাত। হয়, অমিতাভ বচ্চনৰ বোৱাৰী ঐশ্বৰ্য ৰায় বচ্চনৰ সৈতে সম্পৰ্ক বেয়া হৈছে পৰিয়ালটোৰ।এতিয়া ঐশ্বৰ্য আৰু তেওঁৰ কন্যা আৰাধ্যা বেলেগে থাকিবলৈ লৈছে।শেহতীয়া বহু অনুষ্ঠানত ঐশ্বৰ্য আৰু আৰাধ্যাৰ সৈতে পৰিয়ালটোৰ কোনো সদস্যক দেখা পোৱা নাই।ছ’চিয়েল মেডিয়াত এই সংঘাতৰ বিষয়টোক কেন্দ্ৰ কৰি বিভিন্নজনে বিভিন্ন মন্তব্য কৰা পৰিলক্ষিত হৈছে।
শেহতীয়াকৈ এটা বিশেষ ভিডিঅ’ ছ’চিয়েল মেডিয়াত ভাইৰেল হৈছে।য’ত দেখা গৈছে যে ঐশ্বৰ্য ৰায়ক শহুৰ অমিতাভ বচ্চনে উপেক্ষা কৰিছে।এই ভিডিঅ’ত অজস্ৰজনে ‘বি বিগ’ৰ এই ব্যৱহাৰক সমালোচনা কৰি মন্তব্য কৰিছে।কিন্তু এই ভিডিঅ'টো দেখাৰ পাছতো 'বিগ বি'ক সমৰ্থন কৰি মুকলিকৈ মাত মাতিলে অভিনেত্ৰী তথা পৰিচালক ছিমি গাৰেৱালে।
ছিমি গাৰেৱালে সকলো সমলোচকক উদ্দেশ্যি লেখিছে, 'আপোনালোকে একো নাজানে।একো নজনাকৈ কাৰোবাক দোষাৰোপ কৰাটো খুবেই বেয়া কথা।এই সকলোবোৰ বন্ধ কৰক।' অভিনেত্ৰীগৰাকীৰ এই মন্তব্যৰ পাছতেই ছ'চিয়েল মেডিয়া ব্যৱহাৰকাৰীসকলে তেওঁক প্ৰকৃত সত্য স্পষ্ট কৰিবলৈ আহ্বান জনাইছে।অৱশ্যে এই মন্তব্যৰ পিছত অভিনেত্ৰীগৰাকীয়ে আৰু কোনো মন্তব্য দিয়া পৰিলক্ষিত হোৱা নাই।
দৰাচলতে, 'বিগ বি'ৰ বিৰুদ্ধে অনুৰাগীয়ে অভিযোগ কৰিছে যে, তেওঁ প্ৰায়ে তেওঁৰ জীয়ৰী শ্বেতা, পুত্ৰ অভিষেক আৰু নাতিনী নব্যাক প্ৰশংসা কৰি ছ'চিয়েল মেডিয়াত প'ষ্ট কৰি থাকে। কিন্তু কেতিয়াও তেওঁৰ বোৱাৰী ঐশ্বৰ্য ৰায়ৰ বিষয়ে একো প'ষ্ট নকৰে। তেওঁৰ এনে মনোভাৱক সকলোয়ে সমালোচনা কৰিছে।শেহতীয়াকৈ ঐশ্বৰ্য ৰায়ে বঁটা লাভ কৰিছিল, কিন্তু পৰিয়ালৰ কোনো সদস্যই এই বিষয়ত একো প'ষ্ট কৰা নাছিল।ইয়াৰ পাছতো অনুৰাগীয়ে বচ্চন পৰিয়ালৰ বিৰুদ্ধে ক্ষোভ প্ৰকাশ কৰা পৰিলক্ষিত হৈছিল।
