তামুলপুৰত বিধায়কৰ বিনামূলীয়া ক'চিংঃ বাচনি পৰীক্ষাত শতাধিক ছাত্ৰ-ছাত্ৰী...

ডিজিটেল সংবাদ, তামুলপুৰঃ তামুলপুৰ বিধান সভা সমষ্টিৰ বিধায়ক জলেন দৈমাৰীৰ উদ্যোগত তামুলপুৰৰ সামগ্ৰিক উন্নয়নৰ লগতে শৈক্ষিক উত্তৰণৰ বাবে এক প্ৰশংসনীয় পদক্ষেপ গ্ৰহণ কৰিছে ৷ মানৱ সম্পদ সৃষ্টিৰ বাবে বিধায়ক গৰাকীয়ে বিগত বৰ্ষত সমষ্টিটোৰ শিক্ষিত ছাত্ৰ-ছাত্ৰী সকলৰ মাজত প্ৰতিযোগিতামূলক পৰীক্ষা বিশেষকৈ অসম লোক সেৱা আয়োগৰ পৰীক্ষাত অৱতীৰ্ণ হ'বলৈ নিজাববীয়াকৈ এপিএছচি চুপাৰ-৫ বাচনি পৰীক্ষা অনুষ্ঠিত কৰিছিল। বাচনি পৰীক্ষাত উত্তীৰ্ণ ৫ গৰাকী ছাত্ৰ-ছাত্ৰীক উক্ত প্ৰতিযোগিতা মূলক পৰীক্ষাত অৱতীৰ্ণ হোৱাৰ বাবে বিনামূলীয়া ক'চিঙৰ দিহা কৰিছিল ৷

এইবেলিও ১০ গৰাকী ছাত্ৰ-ছাত্ৰীক নিৰ্বাচন কৰি এপিএছচিৰ প্ৰতিযোগিতামূলক পৰীক্ষাত অৱতীৰ্ণ হ'বৰ বাবে এবছৰীয়া বিনামূলীয়া ক'চিঙৰ দিহা কৰিছে ৷ তদুপলক্ষে দেওবাৰে বিধায়কগৰাকীয়ে দলীয় কৰ্মীসকলৰ সহযোগত এপিএছচি চুপাৰ-১০ৰ বাবে আবেদন কৰা ছাত্ৰ-ছাত্ৰীসকলৰ মাজত এক বাচনি পৰীক্ষা অনুষ্ঠিত কৰে ৷ তামুলপুৰ উচ্চতৰ মাধ্যমিক বিদ্যালয়ত অনুষ্ঠিত কৰা এই বাচনি পৰীক্ষাত ১৬০ গৰাকী ছাত্ৰ-ছাত্ৰী অৱতীৰ্ণ হয় ৷

১৬০ গৰাকীৰ পৰাই ১০ গৰাকী ছাত্ৰ-ছাত্ৰী নিৰ্বাচন কৰি এপিএছচিৰ বাবে বিনামূলীয়াকৈ প্ৰশিক্ষণৰ ব্যৱস্থা কৰিব । পৰীক্ষাৰ পূৰ্বে ছাত্ৰ-ছাত্ৰী সকলৰ মাজত এক অৰিয়েণ্টেচন কাৰ্যসূচী গ্ৰহণ কৰে ৷ কাৰ্যসূচীৰ শুভ উদ্বোধন কৰে বিটিআৰৰ চীফ প্ৰমোদ বড়োৱে ৷

বড়োৱে ছাত্ৰ-ছাত্ৰীসকলক উদ্দেশ্যি ৰখা বক্তব্যত সদায় একাগ্ৰতাৰে অধ্যয়ন কৰি ভৱিষ্যতৰ দিনত খোজ দিবলৈ আহ্বান জনায়৷ লগতে পৰীক্ষাৰ্থীসকলক শুভেচ্ছা জ্ঞাপন কৰে বিটিআৰ চীফ গৰাকীয়ে ৷ অনুষ্ঠানত বিধায়ক জলেন দৈমাৰীৰ লগতে তামুলপুৰৰ এবছু, আৰছু, এবিএমছু আদি ছাত্ৰ সংগঠনৰ নেতা কৰ্মসকল উপস্থিত থাকে ৷

Also Read: কৰিমগঞ্জৰ বদৰপুৰত পথ দুৰ্ঘটনা: থিতাতে নিহত এজনৰ বিপৰীতে আহত...