ডিজিটেল সংবাদ, জামুগুৰিহাটঃ অসম গণ পৰিষদ দলৰ কেন্দ্ৰীয় মুখপাত্ৰ পাৰ্থপ্ৰতীম বৰাই চতিয়া সমষ্টিৰ বিধায়ক পদ্ম হাজৰিকাৰ বিৰুদ্ধে জামুগুৰিহাটৰ সাংবাদিকে বাতৰি নকৰে বুলি মন্তব্য কৰাত জাঙুৰ খাই উঠিছে জামুগুৰিহাটৰ সাংবাদিকমহল ৷ পাৰ্থপ্ৰতীম বৰাৰ এনে মন্তব্যৰ বিৰোধীতা কৰি শুকুৰবাৰে জামুগুৰিহাটৰ সাংবাদিকসকলে এক সভা অনুষ্ঠিত কৰি মুখপাত্ৰগৰাকীক তীব্ৰ গৰিহনা দিয়ে ৷
পাৰ্থ প্ৰতীম বৰাই কৰা এনে মন্তব্যৰ বাবে সাংবাদিকসকলৰ ওচৰত ক্ষমা খোজাৰ দাবী তোলে। ক্ষমা নুখুজিলে আইনী ব্যৱস্থা গ্ৰহণ কৰিব বুলিও মন্তব্য কৰে সাংবাদিকসকলে ৷ উল্লেখ্য যে আজিৰে পৰা কেইটামান দিন পূৰ্বে বিধায়ক পদ্ম হাজৰিকাৰ বিৰুদ্ধে গুৱাহাটীত সংবাদমেল আয়োজন কৰি জামুগুৰিহাটৰ সাংবাদিকসকলৰ বিৰুদ্ধেও মাত মাতিছিল অগপৰ মুখপাত্ৰগৰাকীয়ে।
