ডিজিটেল সংবাদ, জামুগুৰিহাটঃ কুৰিৰো অধিক বিহুৱা দলৰ ঢোল পেঁপা গগনাৰ মাতৰে মুখৰিত হৈ পৰিল জামুগুৰিহাটৰ ঐতিহ্যমণ্ডিত বৰপুখুৰী পাৰৰ বিহুমেলাৰ বাকৰি ।
অসমৰ মুকলি বিহুৰ বাটকটীয়া স্বৰূপ জামুগুৰিহাটৰ ঐতিহ্যমণ্ডিত বৰপুখুৰী পাৰৰ ৬২ সংখ্যক মুকলি বিহু প্ৰতিযোগিতা খনি (বুধবাৰে) বিয়লিৰ ভাগত তেজপুৰ সমষ্টিৰ বিধায়ক পৃথীৰাজ ৰাভাই নিজে বিহুগীত গাই শুভ উদ্বোধন কৰে ।
লগতে নিশাৰ ভাগলৈকে বিহুদলসমুহে প্ৰদৰ্শন কৰে বিহু । বৃত্তাকাৰ চৌহদত এটি এটিকৈ অসমৰ বিভিন্ন প্ৰান্তৰ পৰা অহা বিহুদল সমূহে প্ৰায় তিনিঘন্টাৰো অধিক সময় ধৰি একেসময়তে শ শ ঢুলীয়া নাচনীয়ে বিহু প্ৰদৰ্শন কৰে ।
প্ৰায় পোন্ধৰ সহস্ৰাধিক ৰাইজে প্ৰাণভৰি উপভোগ কৰে অসমৰ মুকলি বিহুৰ এই বিনন্দীয়া ৰূপ । ইতিমধ্যে সোণালী জয়ন্তী বৰ্ষ অতিক্ৰম কৰি এইবাৰ ৬২ সংখ্যক বৰ্ষত ভৰি দিয়া জামুগুৰিহাটৰ এই ঐতিহ্যমণ্ডিত মুকলি বিহু প্ৰতিযোগিতাখনি উপভোগ কৰি আপ্লুত হৈ পৰে শোণিতপুৰ জিলাৰ উপায়ুক্ত দেৱ কুমাৰ মিশ্ৰও ।
এই মুকলি বিহুতেই জামুগুৰিহাটৰ প্ৰবীন বৰবিহুৱা মোহন শইকীয়াক “ধনকেতেকী” উপাধিৰে সন্মান প্ৰদান কৰা হয় । লগতে জামুগুৰিহাটৰ সু-সন্তান তথা মুখ্যমন্ত্ৰীৰ বিশেষ কৰ্তব্যৰত বিষয়া কুন্টলমণি শৰ্মা বৰদলৈকো বৰপুখুৰীপাৰ মুকলি বিহু কমিটিয়ে গামোছা, জাপি, চেলেং আৰু প্ৰশস্তি পত্ৰৰে বিশেষভাৱে সম্বৰ্ধনা জ্ঞাপন কৰে ৷
জামুগুৰিয়া ৰাইজে বছৰ বছৰ ধৰি ধাৰাবাহিকভাৱে অনুষ্ঠিত কৰি অহা এই বিহুমেলা সংস্কৃতিবান জামুগুৰিয়া ৰাইজৰ স্বাভিমান বুলিও উল্লেখ কৰে জিলা উপায়ুক্ত গৰাকীয়ে।
