আধৰুৱা সপোন বাস্তৱায়িত হ’ল পৰাগ চলিহাৰঃ বিশ্ববিদ্যালয়লৈ উন্নীত হ’ল শিৱসাগৰ কলেজ, জয়সাগৰ...

ডিজিটেল সংবাদ,শিৱসাগৰঃ সেউজ কোঁৱৰ পৰাগ চলিহাৰ সপোন বাস্তৱায়িত হ’ল৷ মহাসতী স্বদেশ আৰু স্বজাতিৰ মংগলৰ বাবে মৌনব্ৰতেৰে প্ৰাণ আহুতি দিয়া মহাসতী জয়মতীৰ স্মৃতি বিজড়িত জয়সাগৰ পুখুৰীৰ পাৰত অৱস্থিত শিৱসাগৰ কলেজ, জয়সাগৰ বিশ্ববিদ্যালয়লৈ উন্নীত হ’ল ৷ উল্লেখ্য যে ফুলনিৰ কবি পদ্মধৰ চলিহা আৰু সেউজ কোঁৱৰ পৰাগ চলিহাৰ নেতৃত্বত শিৱসাগৰৰ একাংশ সমাজ সচেতন লোকে ১৯৪৭ চনৰ ২ নৱেম্বৰৰ প্ৰতিষ্ঠা কৰিছিল শিৱসাগৰ কলেজ, জয়সাগৰ ৷

প্ৰথমতে শিৱসাগৰ চহৰত থকা ঐতিহ্যমণ্ডিত কালী প্ৰসাদ সোঁৱৰণী ভৱনত শিৱসাগৰ কলেজৰ পাঠদান আৰম্ভ হৈছিল ৷ তাৰ পিছত এই কলেজৰ স্থায়ী ভৱন জয়সাগৰ পুখুৰীৰ পাৰত নিৰ্মাণ কৰা হয় ৷

অসমত শৈক্ষিক আন্দোনল গঢ়াত এইখন কলেজৰ অৱদান লেখত ল’বলগীয়া ৷ খ্যাতনামা কথাশিল্পী তথা পদ্মশ্ৰী সন্মান প্ৰাপক ইমৰান শ্বাহ এইখন কলেজৰ প্ৰাক্তন ছাত্ৰ আৰু অধ্যাপক ৷ বুৰঞ্জীবিদ তথা পদ্মশ্ৰী সন্মান প্ৰাপক  ড° যোগেন্দ্ৰ নাথ ফুকনৰ পৰা আৰম্ভ কৰি অনেক শিক্ষাবিদ সাহিত্যিক, বিজ্ঞানী, ৰাজনৈতিক নেতা, প্ৰশাসনিক বিষয়া এইখন কলেজৰ ছাত্ৰ ৷ অসমৰ স্বনামধন্য সাহিত্যিক ড° ভবেন্দ্ৰনাথ শইকীয়া, অসম সাহিত্য সভাৰ প্ৰাক্তন সভাপতি বীৰেন বৰকটকী, ড° কৃষ্ণ কুমাৰ মিশ্ৰ, ডম্বৰু কাকতী, ভাষাতত্ত্ববিদ ড° নাহেন্দ্ৰ পাদুন, নাট্যাচাৰ্য যোগেন চেতিয়া, সাংবাদিক জ্যোতিপ্ৰসাদ চলিহা, শৰৎ মহন্তকে ধৰি অনেক খ্যাতনামা ব্যক্তি এই কলেজৰ অধ্যাপক আছিল ৷

 পৰাগ চলিহাৰ নেতৃত্বত এই কলেজে এটা সময়ত ভাৰতৰ আগশাৰীৰ কলেজৰ লগত ফেৰ মাৰিবলৈ সক্ষম হৈছিল ৷ কলেজৰ অধ্যক্ষ হৈ থকাৰ সময়তে পৰাগ চলিহাই শিৱসাগৰ কলেজ, জয়সাগৰক বিশ্ববিদ্যালয় ৰূপে প্ৰতিষ্ঠা কৰাৰ সপোন দেখিছিল ৷ এনে উদ্দেশ্য আগত ৰাখি চলিহাই এই কলেজৰ ছাত্ৰ ছাত্ৰীক শৈক্ষিক দিশৰ সমান্তৰালকৈ ক্ৰীড়া আৰু সাংস্কৃতিক দিশত আগবঢ়াই নিছিল ৷ কিন্ত চলিহাৰ সপোন তেওঁৰ জীৱনকালত বাস্তৱায়িত হৈ নুঠিল ৷ 

 ২০২১ চনৰ নৱেম্বৰত শিৱসাগৰ কলেজে উদযাপন কৰা মহাৰজত জয়ন্তী অনুষ্ঠানত অসমৰ মুখ্যমন্ত্ৰী ড° হিমন্ত বিশ্বশৰ্মাই অংশগ্ৰহণ কৰিছিল ৷ য'ত পৰাগ চলিহাৰ সহধৰ্মিনী দিপালী চলিহাই তেওঁৰ আধৰুৱা সপোনৰ কথা দোহাৰি মুখ্যমন্ত্ৰীক শিৱসাগৰ কলেজক বিশ্ববিদ্যালয়লৈ উন্নীত কৰাৰ আহ্বান জনাই ৷ লক্ষ্যণীয় ভাৱে মুখ্যমন্ত্ৰী ড° হিমন্ত বিশ্ব শৰ্মাই তিনিবছৰৰ ভিতৰত শিৱসাগৰ কলেজক বিশ্ববিদ্যালয়লৈ উন্নীত কৰা হ’ব বুলি আশ্বাস প্ৰদান কৰিছিল ৷

নিজৰ প্ৰতিশ্ৰুতি ৰক্ষা কৰি মুখ্যমন্ত্ৰীয়ে শিৱসাগৰ কলেজক বিশ্ববিদ্যালয়লৈ উন্নীত কৰাৰ কাম আৰম্ভ কৰে ৷ শেহতীয়া ভাৱে এই বিশ্ববিদ্যালয়ৰ কাম-কাজ আগবঢ়াই নিয়াৰ বাবে ডিব্ৰুগড়ৰ বিশ্ববিদ্যালয়ৰ উপাচাৰ্য প্ৰফেচৰ ড° জীতেন হাজৰিকাক  অতিৰিক্ত ভাৱে শিৱসাগৰ বিশ্ববিদ্যালয়ৰ ভাৰপ্ৰাপ্ত উপাচাৰ্য হিচাপে অসমৰ ৰাজ্যপালে নিযুক্তি প্ৰদন কৰা হয় ৷

বিশ্ববিদ্যালয়ৰ মান্যতা লাভ কৰাৰৰ পিছত  জয়সাগৰ পুখুৰীৰ পাৰত অৱস্থিত শিৱসাগৰ বিশ্ববিদ্যালয়ত ড° জীতেন হাজৰিকাই আনুষ্ঠানিক ভাৱে উপাচাৰ্য্য হিচাপে যোগদান কৰে ৷ এই উপলক্ষে এক গাম্ভীৰ্যপূৰ্ণ অনুষ্ঠানৰ আয়োজন কৰা হয় ৷ অধ্যাপক ড° দিলীপ দাসে আঁতধৰা সভাখনত উপাচাৰ্য ড° জীতেন হজৰিকাই কয় শিৱসাগৰ কলেজক পৃথিৱীৰ ভিতৰত এখন শ্ৰেষ্ঠ বিশেষ বিদ্যালয় ৰূপে প্ৰতিষ্ঠিত কৰাতো প্ৰত্যাহ্বান যদিও ইয়াক সুযোগলৈকে ৰূপান্তৰিত কৰিব লাগিব ৷

ড° হাজৰিকাই কয় আমাৰ দেশত ২০০০ বছৰৰ পূৰ্বে নালন্দা, তক্ষশিলাকে ধৰি  কেইখনমান বিশ্ববিদ্যালয়হে আছিল ৷ ১৮৫৭ চনত কলিকতা, আগ্ৰাকে ধৰি পাঁচখনমান বিশ্ববিদ্যালয় স্থাপন কৰা হৈছিল যদিও দেশে স্বাধীনতা লাভ কৰাৰ পৰা এই ৭৬ বছৰত দেশত বিশ্ববিদ্যালয়ৰ সংখ্যা প্ৰায় ১২০০ ৰ ঘৰত উপনীত হ’ব ৷ বিশ্ববিদ্যালয়ৰ সংখ্যা বৃদ্ধি হ’লেই নহ’ব, গুণগত মান উন্নত হ’ব লাগিব ৷ শিৱসাগৰ বিশ্ববিদ্যালয় প্ৰতিষ্ঠা কৰা পদ্মধৰ চলিহা, পৰাগ চলিহা সহিতে বাকী ব্যক্তিসকলৰ অৱদানক পাহৰিলে নহ’ব।

শিৱসাগৰ বিশ্ববিদ্যালয়ৰ কাম শূন্যৰ পৰা আৰম্ভ হ’ব ৷ ইয়াত পূৰ্ণ পৰ্যায়ৰ এগৰাকী উপাচাৰ্য প্ৰয়োজন ৷ এগৰাকী উপাচাৰ্যই দুখন বিশ্ববিদ্যালয়ৰ কাম পৰিচালনা কৰাতো কঠিন ৷ ড° জীতেন হাজৰিকাই কয় এতিয়াৰে পৰা এই বিশ্ববিদ্যালয়ৰ অধ্যাপকৰ দায়িত্ব বাঢ়িল ৷ তেওঁ কয় শিক্ষকে কেতিয়াও কামত ফাকি নিদিয়ে ৷ এতিয়াৰে পৰা শিৱসাগৰ বিশ্ববিদ্যালয়ৰ শিক্ষক সকল আবেলি ৫.৩০ বজালৈকে বিশ্ববিদ্যালয়ত থাকিব লাগিব ৷ পাঠদান হৈছে নে নাই এইবোৰ দিশ শিক্ষকে নিজেই পৰ্যবেক্ষণ কৰিব লাগিব ৷ তেওঁ তিনিমাহৰ ভিতৰত প্ৰাথমিক পৰ্যায়ৰ কাম সমাপ্ত কৰিব বুলি মন্তব্য কৰে ৷

অনুষ্ঠানৰ আৰম্ভণিতে ড° জীতেন হজৰিকাই উপাচাৰ্য্যৰ আসনত বহে ৷ তাৰ পিছতেই পদ্মধৰ চলিহাৰ প্ৰতিমূৰ্তিৰ সন্মুখত বন্তি প্ৰজ্বালন কৰি ডিব্ৰুগড়ৰ বিশ্ববিদ্যালয়ৰ পঞ্জীয়ক ড° পৰমানন্দ সোনোৱালে ৷ সেউজ কোঁৱৰ পৰাগ চলিহাৰ প্ৰতিমূৰ্তিৰ সন্মুখত বন্তি প্ৰজ্বালন কৰে সমাজ সংগঠক সৌৰভ চলিহাই ৷ শিৱসাগৰ বিশ্ববিদ্যালয়ৰ পঞ্জীয়ক ড° প্ৰফুল্ল কলিতাই  কয় শিৱসাগৰ কলেজক বিশ্ববিদ্যালয়লৈ উন্নীত কৰাৰ বাবে অনেক লোকে দেখা সপোন আজি বাস্তৱায়িত হ’ল ৷ চালুকীয়া অৱস্থাত থকা এই বিশ্ববিদ্যালয়ক পূৰ্ণাংগ ৰূপ দিয়াত ড° জীতেন হাজৰিকা সফল হ’ব বুলি আশা প্ৰকাশ কৰে ৷ বিশ্ববিদ্যালয়ৰ শিক্ষক কৰ্মচাৰীৰ দায়িত্ব  আৰু কৰ্তব্য বৃদ্ধি পালে বুুুলি ড° প্ৰফুল্ল কলিতাই মন্তব্য কৰে ৷ 

ডিব্ৰুগড় বিশ্ববিদ্যালয়ৰ উপাচাৰ্য ড° পৰমানন্দ সোণোৱালে কয় শিৱসাগৰৰ চহকী ইতিহাস আছে ৷ শিৱসাগৰৰ ঐতিহ্য আৰু গৰিমাৰ কথা কৈ শেষ কৰিব নোৱাৰি ৷ হ’লেও স্বাধীনতাৰ পিছত শিৱসাগৰ বহুকেইটা দিশত পিচপৰি ৰ’ল ৷ এইখন জিলাত এখন আইন মহাবিদ্যালয় নাই, অভিযান্ত্ৰিক মহাবিদ্যালয় নাই, আনকি এখন বি এইড কলেজো চৰকাৰী ভাৱে প্ৰতিষ্ঠা ন’হল ৷ শিৱসাগৰ কলেজক বিশ্ববিদ্যালয়লৈ উন্নীত কৰাতো অসম চৰকাৰৰ ঐতিহাসিক সিদ্ধান্ত বুলি পৰমানন্দ সোণোৱালে কয় ৷

শিৱসাগৰ কলেজৰ প্ৰাক্তন অধ্যক্ষ তথা পৰিচালনা সমিতিৰ সভাপতি ড° প্ৰকাশ কটকীয়ে বক্তব্য আগবঢ়ায়৷ শিৱসাগৰ বাণিজ্য মহাবিদ্যালয়ৰ অধ্যক্ষ ড° সৌমাৰজ্যোতি মহন্তই পৰাগ চলিহাৰ নেতৃত্বত শিৱসাগৰ কলেজ উত্তৰ পূব ভাৰতৰ ভিতৰত শ্ৰেষ্ঠ কলেজ ৰূপে প্ৰতিষ্ঠিত হোৱা বুলি মন্তব্য কৰে ৷ আজিৰ অনুষ্ঠানত নতুন তথা প্ৰথম গৰাকী উপাচাৰ্যক বিশ্ববিদ্যালয়ৰ শিক্ষক কৰ্মচাৰীৰ লগতে শিৱসাগৰ আঞ্চলিক ছাত্ৰ সন্থাৰ হৈ সমীৰণ ফুকন, সাংবাদিক সোমেশ ডেকা, আটাছুুুৰ জিলা সমিতিৰ হৈ পাৰ্থ গগৈয়ে সম্বৰ্ধনা জনায় ৷

এই অনুষ্ঠানত ৰাজীৱ গান্ধী সমবায় বিশ্ববিদ্যালয়ৰ শিক্ষক কৰ্মচাৰী সকলো উপস্থিত থাকে ৷ যিহেতু চৰকাৰে ৰাজীৱ গান্ধী সমবায় বিশ্ববিদ্যালয় শিৱসাগৰ বিশ্ববিদ্যালয়ৰ লগত সংলগ্ন কৰাৰ কথা ইতিপূৰ্বে ঘোষণা কৰিছে ৷অনুষ্ঠানত যোৰহাট কেন্দ্ৰীয় মহাবিদ্যালয়ৰ অধ্যক্ষ ড° দুলেন শইকীয়া, গড়গাঁও মহাবিদ্যালয়ৰ অধ্যক্ষ ড° সব্যসাচী মহন্তকে ধৰি ভালেকেইখন কলেজৰ অধ্যক্ষ উপস্থিত থাকে ৷