নৰ্থ লখিমপুৰ মহাবিদ্যালয়ৰ বিশেষ অনুষ্ঠানত বিধায়ক পদ্ম হাজৰিকা...

ডিজিটেল সংবাদ, লখিমপুৰ: বাণিজ্যিক কৃষি কৰ্মৰে স্বাৱলম্বী ন’হলে জাতি এটাৰ অৰ্থনৈতিক ভেটি টনকিয়াল নহয় ৷ পথাৰ আৰু বজাৰ দখল কৰিলে জাতি এটাই উন্নয়নৰ ঢাপত বাট বুলিব পাৰে ৷ কেৱল কৰ্মবিমুখক সাৱটি বহি থাকিলে মূল্যৱান সময় পাৰ হ’ব ৷ আমি অসমীয়া নহওঁ দুখীয়া বুলিবলৈ হ’লে অসমীয়াই দুহাতেৰে কৃষি কৰ্ম কৰিব লাগিব ৷ এই দৰে মন্তব্য আগবঢ়াই চতিয়াৰ বিধায়ক পদ্ম হাজৰিকাই ৷

শণিবাৰে উত্তৰ অসমৰ আগশাৰীৰ উচ্চ শিক্ষানুষ্ঠান নৰ্থ লখিমপুৰ স্বায়ত্ত্বশাসিত মহাবিদ্যালয়ৰ কেৰিয়াৰ কাউঞ্চিলিং চেলৰ দ্বাৰা আয়োজিত “অসমত সমবায় ব্যৱস্থাপনা আৰু উদ্যমিতাৰ বিকাশ সম্ভাৱনীয়তা আৰু প্ৰত্যাহ্বান” শীৰ্ষক বক্তৃতা প্ৰদান কৰে বিধায়ক গৰাকীয়ে ৷ উল্লেখযোগ্য যে, ১৯৯৬ চনৰ পৰা বিধায়ক হিচাবে চতিয়া বিধান সভা সমষ্টিক প্ৰতিনিধিত্ব কৰা পদ্ম হাজৰিকাই প্ৰায় দহ হাজাৰোধিক স্থানীয় যুৱক-যুৱতীক কৃষি কৰ্ম আৰু কৃষিজাত দ্ৰব্যৰ বাণিজ্যৰ দ্বাৰা স্বনিয়োজন আৰু ৰোজগাৰৰ বাট দেখুৱাই আহিছে ৷

জৈৱিক কৃষি, শাক-পাচলি, দুগ্ধজাত সামগ্ৰীৰ উৎপাদন, হাঁহ, কুকুৰা, মীনপালন আদিৰ যোগেদি বিধায়ক হাজৰিকাই জামুগুৰি হাটত কণ্যকা গ্ৰাম্য কৃষি পৰ্যটন ক্ষেত্ৰ গঢ় দিছে ৷ স্ব-নিয়োজনৰ বাটকটীয়া হিচাবে কণ্যকা বহুমুখী কৃষি পামৰ যোগেদি বিধায়ক পদ্ম হাজৰিকাই নৱ প্ৰজন্মক কৰ্মসংস্থাপনৰ দিহা কৰি এক নিদৰ্শন প্ৰদৰ্শন কৰি আহিছে ৷ নৰ্থ লখিমপুৰ মহাবিদ্যালয়ৰ ছাত্ৰ-ছাত্ৰী সকলক উপকৃত কৰিব পৰাকৈ পদ্ম হাজৰিকাক আমন্ত্ৰণ জনাই উক্ত বক্তৃতানুষ্ঠানৰ আয়োজন কৰে মহাবিদ্যালয়খনৰ কৰ্তৃপক্ষই ৷

ভাষণ প্ৰসংগত বিধায়ক হাজৰিকাই কয় যে, “অসমীয়া জাতিয়ে দুহাতেৰে কৃষি কৰ্ম কৰি উৎপাদন নকৰিলে ৰুগীয়া হ’ব ৷ কাৰণ এতিয়া বজাৰত ৰাসায়নিক সাৰ যুক্ত শাক পাচলিয়ে ভৰি পৰিছে ৷ এই সমূহ গ্ৰহণ কৰাৰ পাছত মানুহবোৰ ৰুগীয়া হ’ব আৰু গাঁৱে-গাঁৱে চিকিৎসা মহাবিদ্যালয় পাতিলেও ৰোগীৰ সংখ্যা নকমিব ৷ নৱ প্ৰজন্মক চাকৰিমুখী নহৈ বাণিজ্যিক অৰ্থত সমবায় ভিত্তিক বৈজ্ঞানিক পদ্ধতিৰ কৃষি কৰ্ম কৰিবলৈ অনুপ্ৰেৰণামুলক ভাৱে বিধায়ক গৰাকীয়ে এই মননশীল বক্তৃতা আগবঢ়ায় ৷ উল্লেখ্য যে, বক্তৃতাৰ অনুষ্ঠানটোত স্থানীয় বিধায়ক মানৱ ডেকাও উপস্থিত থাকে ৷

Also Read: স্কেটিং চেম্পিয়নশ্বিপত ভাগ ল'ব বিচাৰে নেকি ?