ডিজিটেল সংবাদ, দৌলাশালঃ অসম আৰক্ষীৰ অৱসৰপ্ৰাপ্ত অতিৰিক্ত আৰক্ষী অধীক্ষক তথা গুৱাহাটী উচ্চ ন্যায়ালয়ৰ অধিবক্তা যোগেশ চন্দ্র বৰ্মনৰ বৃহস্পতিবাৰে পুৱা ১০ বজাত পৰলোকপ্ৰাপ্তি ঘটে ৷ গুৱাহাটীৰ জু-ৰোডৰ জোনালী পথৰ নিবাসী যোগেশ চন্দ্র বৰ্মনে শাৰীৰিক অসুস্থতাত ভুগি ডিব্ৰুগড়ৰ এখন চিকিৎসালয়ত চিকিৎসাধীন হৈ থকা অৱস্থাত ৮৪ বছৰ বয়সত মৃত্যু হয় ৷
যোগেশ চন্দ্ৰ বৰ্মনে অসম আৰক্ষীত সুদীৰ্ঘ কাল দক্ষতাৰে সেৱা আগবঢ়ায় ১৯৯৮ চনত কামৰূপ মহানগৰৰ অতিৰিক্ত আৰক্ষী অধীক্ষক (সদৰ) হিচাপে চাকৰিৰ পৰা অৱসৰ গ্ৰহণ কৰিছিল ৷ গুৱাহাটীৰ পল্টনবজাৰ, যোৰহাটকে ধৰি অসমৰ বিভিন্ন আৰক্ষী থানাত অ'চি, গোঁসাইগাঁওকে ধৰি বিভিন্ন জিলাত মহকুমা আৰক্ষী বিষয়া, উপ আৰক্ষী অধীক্ষক হিচাপে জনহিতাৰ্থে দক্ষতাৰে সেৱা আগবঢ়াই সুচাৰুৰূপে সম্পন্ন কৰিছিল আৰক্ষীৰ কাৰ্যকাল৷
আৰক্ষীৰ চাকৰিৰ পৰা অৱসৰ গ্ৰহণ কৰি গুৱাহাটী উচ্চ ন্যায়ালত ওকালতি কৰিছিল যোগেশ চন্দ্র বৰ্মনে ৷ সুদক্ষ আৰক্ষী বিষয়া তথা গুৱাহাটী উচ্চ নায়ালয়ৰ অধিবক্তা যোগেশ চন্দ্র বৰ্মনৰ মৃত্যুত আৰক্ষী মহলৰ লগতে অধিবক্তা সমাজৰ মাজত শোকৰ ছাঁ পৰিছে ৷ মৃত্যুৰ সময়ত তেওঁ পত্নী, তিনিগৰাকী জী-জোঁৱাইসহ আত্মীয় স্বজনক ইহসংসাৰত এৰি থৈ যায়৷
