নলবাৰীত উৰণীয়া সেঁতু উদ্বোধন, ১৬৪.১৪ কোটিটকীয়া উন্নয়ন প্ৰকল্পৰ আধাৰশিলা স্থাপন মুখ্যমন্ত্ৰীৰ...

ডিজিটেল ডেস্কঃ এদিনীয়া ভ্ৰমনসূচীৰে নলবাৰীলৈ যোৱা মুখ্যমন্ত্ৰী ড০ হিমন্ত বিশ্ব শৰ্মাই সোমবাৰে জিলাখনত কেইবাটাও প্ৰকল্পৰ আধাৰশিলা স্থাপন কৰে । মুখ্যমন্ত্ৰীয়ে উদ্বোধন কৰে নলবাৰীৰ ধমধমাৰ পথত নিৰ্মিত দুইলেণ্ডযুক্ত উৰণীয়া সেঁতুখন । এই সেঁতুখনৰ দৈঘ্য ৪৬৭.২৪ মিটাৰ আৰু ইয়াৰ প্ৰস্থ ৭.৫ মিটাৰ ।

জিলাখনত যান-যঁট দূৰ কৰাৰ ক্ষেত্ৰত এই উৰণীয়া সেঁতুখন অতিকৈ প্ৰয়োজনীয় আছিল । সেঁতুখনত নিৰ্মাণত ব্যয় হৈছে ৫৪.২৯ কোটি টকা । উল্লেখযোগ্য যে শনিবাৰৰ দিনাই নলবাৰীৰ দ্ৰুত বিকাশ আৰু উন্নয়নত সহায়ক হোৱাকৈ ১৬৪. ১৪ কোটি টকীয়া কেইবাটাও প্ৰকল্প আধাৰশিলা স্থাপন কৰে । এই ভ্ৰমনতে মুখ্যমন্ত্ৰীয়ে জল জীৱন মিছনৰ অংশীদাৰী গাঁৱৰ ৰাইজ, পানী উপভুক্তা কমিটিৰ সদস্য, জলমিত্ৰ, জলদোত, গাওঁ পঞ্চায়তৰ সদস্য, বিদ্যালয় আৰু অংগনবাড়ী কেন্দ্ৰ প্ৰতিনিধিক সামৰি প্ৰথমখন জলজীৱন সন্মিলনতো অংশ লয় ।

মুখ্যমন্ত্ৰী ড০ শৰ্মাই গণেশ মন্দিৰৰ পৰা হৰি মন্দিৰলৈ যোৱা ডেৰ কিলোমিটাৰ দৈঘ্যৰ পথটো গৌৰৱ পথ নামেৰে নামাকৰণৰ লগতে উন্নীতকৰণৰ কামো শুভাৰম্ভ কৰে । ড০ শৰ্মাই এই ভ্ৰমনতো নলবাৰীৰ বৰকুছি মিলনপুৰত চিলাৰায় ভৱনৰ আধাৰশিলা স্থাপন কৰিলে । ২বিঘা ২কঠা ১৫ লোচা ভূমিত নিৰ্মাণ কৰিব লগীয়া এই ভৱনত নলবাৰী জিলা কোঁচ ৰাজবংশী সন্মিলনৰ মুখ্য কাৰ্যালয়ত অতিথি গৃহ, সভা গৃহ আৰু ভূমি মহলাত বিপনী কোঠা থাকিব । ইফালে নলবাৰীৰ পৰিবহন সেৱাত নতুন সংয়োজন ঘটাই অসম ৰাজ্যিক পৰিবহণ নিগমৰ অধীনত নতুনকৈ নলবাৰীত চিটি বাছ সেৱা আনুষ্ঠানিক শুভাৰম্ভণি কৰে মুখ্যমন্ত্ৰীগৰাকীয়ে ।

জিলাখনৰ বিভিন্ন গাওঁ সামৰি লৈ এই সেৱা নলবাৰী চহৰৰ পৰা নলবাৰী চিকিৎসা মহাবিদ্যালয়লৈ চলিব । ড০ শৰ্মাই নলবাৰীৰ গৰ্ডন উচ্চতৰ মাধ্যমিক বিদ্যালয়ত ১০০০খন আসনযুক্ত এটা প্ৰেক্ষাগৃহৰো আধাৰশিলা স্থাপন কৰে । এই ভ্ৰমনতে ৩৮ কোটি টকা ব্যয় সাপেক্ষে এআই আইবি প্ৰকল্পৰ অধীনত ৪টা ৩৩/১১ কেবিৰ উপকেন্দ্ৰ, ১১.৫৫ কোটি ব্যয় সাপাক্ষ মথাউৰি পকীকৰণ আঁচনি, মুখ্যমন্ত্ৰী পকীপথ নবীকৰণ আঁচনি আৰু ১৫ টা মুখ্যমন্ত্ৰীৰ পকীপথ নিৰ্মাণ আঁচনিৰ আধাৰশিলা ভাৰ্চুৱেলী স্থাপন কৰে মুখ্যমন্ত্ৰীয়ে ।

নলবাৰীৰ ভ্ৰমণকালত মুখ্যমন্ত্ৰী ড০ শৰ্মাই কয়, " এই প্ৰকল্প সমূহৰ হকে বিকাশ তীৰ্থ হিচাবে গণ্য কৰিলে ই সদায় জীৱন্ত হৈ থাকিব । তেওঁৰ ভাষণত উল্লেখ কৰে যে, "ৰাজ্যৰ ৩৫ লাখ পৰিয়ালক ইতিমধ্যেই বিশুদ্ধ খোৱাপানী যোগান ধৰা হৈছে ।

মুখ্যমন্ত্ৰী ড০ শৰ্মাই অহা অক্টোবৰৰ ভিতৰত ৰাজ্যৰ ৪০ লাখ পৰিযালক ৰেচন কাৰ্ড প্ৰদান কৰিব বুলিও সদৰি কৰে । এই কাৰ্ড লাভ কৰা দৰিদ্ৰ সীমাৰেখাৰ তলৰ পৰিয়ালে বিনামূলীয়া চাউলৰ লগতে ৫ লাখ টকাৰ বিনামূলীয়া চিকিৎসা সেৱাও লাভ কৰিব ।

মুখ্যমন্ত্ৰীয়ে চেপ্তেম্বৰৰ ভিতৰত নতুনকৈ ৭লাখ অৰুণোদয় হিতাধীকাৰী অন্তৰ্ভুক্ত, এই আঁচনিৰ ধনৰাশি ১২৫০ টকাৰ পৰা ১৪০০ টকালৈ বৃদ্ধি , প্ৰতিটো আত্মসহায়ক গোটৰ সদস্যক ১০ হাজাৰ টকাকৈ অনুদান, ২লাখ নিবনুৱা যুৱক-যুৱতীক উদ্যোগ বা বাণিজ্যৰ বাবে ২ লাখ টকাকৈ আগবঢাব বুলি জানিব দিয়ে ।

ভাষণ প্ৰসংগত নলবাৰীত মুখ্য়মন্ত্ৰীয়ে ৰাজ্যত নতুনকৈ ৮ খন বিশ্ববিদ্যালয় স্থাপন কৰিব বুলি জানিব দিয়ে । এই অনুষ্ঠানত মুখ্যমন্ত্ৰীৰ সৈতে চন্দ্ৰমোহন পাটোৱাৰী, অজন্তা নেওগ, ৰঞ্জিত কুমাৰ দাস, নন্দিতা গাৰ্লোচা, জয়ন্ত মল্ল বৰুৱা, দিলিপ শইকীয়া, কুইন ওজা আদিৰ লগতে যথেষ্ঠ সংখ্যক দলীয় বিধায়ক উপস্থিত থাকে ।

Also Read: ডিমা হাছাওত লাগে এটা লোকসভা আৰু দুটা বিধানসভা সমষ্টিঃ নিৰ্বাচন আয়োগলৈ প্ৰেৰণ স্মাৰক পত্ৰ...