ডিজিটেল ডেস্কঃ দেশৰ মুখ্য নিৰ্বাচনী আয়ুক্তই শেহতীয়া সমষ্টি পুনৰ নিৰ্ধাৰণৰ খচৰাকলৈ এক স্মাৰক পত্ৰ প্ৰেৰণ কৰিছিল ডিমা হাছাও সমষ্টি পুনৰ নিৰ্ধাৰণ দাবী কমিটিয়ে । এই স্মাৰক পত্ৰত আয়োগক ডিমা হাছাও পাৰ্বত্য জিলাৰ বাবে এটা পৃথক লোকসভা সমষ্টি আৰু এটা নতুনকৈ বিধানসভা সমষ্টি সৃষ্টিৰ বাবে দাবী জনোৱা হৈছে ।
লোকসভা সমষ্টিটো জনজাতি লোকৰ বাবে সংৰক্ষিত কৰাৰ দাবী তুলিছে ডিমা হাছাও পুনৰ নিৰ্ধাৰণ দাবী কমিটিয়ে । জিলাখনৰ উপাযুক্তৰ জৰিয়তে প্ৰেৰণ কৰা স্মাৰক পত্ৰত কোৱা হৈছে যদিও ডিমা হাছাও জিলাখন ষষ্ঠ অনুসূচীৰ অন্তৰ্গত এখন পুৰণি স্বায়ত্বশাসিত পৰিষদ আছে। এই জিলাখনৰ জনসংখ্যাও আন জিলাৰ তুলনাত কম ।
১৯৫২ চনত ৩৫০০০ জনবসতি থকা জিলাখনত হাফলং নামৰ এটা বিধানসভা সমষ্টি গঠন কৰা হৈছিল । বৰ্তমান জিলাখনত জনসংখ্যা ২,১৪,১০২ গৰাকীকৈও অধিক । সেয়েহে এই জিলাখনৰ বাবে এটা পৃথক লোকসভা সমষ্টি আৰু এটা বিধানসভা সমষ্টিৰ প্ৰয়োজন হৈ পৰিছে । প্ৰায় ৯৮ শতাংশ পাহাৰীয়া অঞ্চলেৰে গঠিত জিলাখনত উন্নয়নৰ কাম-কাজ খৰতকীয়া কৰিবলৈ এনে সিদ্ধান্ত লোৱাৰ প্ৰয়োজন বুলি স্মাৰক পত্ৰত উল্লেখ কৰিছে ।
জিলাখনৰ সামাজিক নিৰাপত্তা, আৰ্থিক আৰু ৰাজনৈতিক অনগ্ৰসৰতাৰ প্ৰতি লক্ষ্য ৰাখি এই পদক্ষেপ গ্ৰহণৰ দাবী জনোৱা হৈছে । চুবুৰীয়া কাৰ্বি আংলং জিলাৰ মুঠ মাটিকালি ১০,৪৩৩ বৰ্গ কিলোমিটাৰ । এই জিলাখনতে ৫ টা বিধানসভা সমষ্টিৰো প্ৰস্তাৱ দিয়া হৈছে।
কিন্তু ডিমা হাছাও জিলাখনৰ মুঠ মাটিকালি ৪,৮৮৮ বৰ্গকিলোমিটাৰ । সেই হিচাপত আন এটা নতুন বিধানসভা সমষ্টি গঠন কৰাটো প্ৰয়োজন বুলি দাবী কৰিছে কমিটিয়ে । পাহাৰীয়া জিলাখনৰ উন্নয়নৰ স্বাৰ্থত ভাৰত চৰকাৰক বিশেষ পদক্ষেপ ল'বলৈ দাবী জনাইছে তেওঁলোকে । মেঘালয়, নাগালেণ্ড, মিজোৰাম, আদি ৰাজ্যৰ আৰ্হিত ডিমা হাছাওত বিধানসভা আৰু লোকসভা সমষ্টি গঠনৰ প্ৰস্তাৱ দিছে তেওঁলোকে ।
ভাৰতীয় নিৰ্বাচন আয়োগে উল্লেখ কৰিছিল নিম্ন জনসংখ্যা বৃদ্ধি জিলাসমূহ যাতে সমষ্টি পুনৰ নিৰ্ধাৰণৰ ক্ষেত্ৰত সুবিধাৰ পৰা বঞ্চিত নহয় তাৰ প্ৰতি লক্ষ্য ৰখা হ'ব । সেই যুক্তিত ডিমা হাছাওৰ প্ৰতি আয়োগে বিশেষ দৃষ্টি ৰাখিবলৈ কোৱা হৈছে ।
