বৰতলাত হেঙুল থিয়েটাৰৰ মঞ্চত “আকাশৰ তৰা" উন্মোচন

ডিজিটেল সংবাদ,দৌলাশাল : প্ৰতিশ্ৰুতিসম্পন্ন কবি,গল্পকাৰ,লেখক মনমোহন বৈশ্যৰ সদ্য প্ৰকাশিত গল্পপুথি “আকাশৰ তৰা" মঙ্গলবাৰে উন্মোচন কৰা হয় ৷ নলবাৰী জিলাৰ বৰক্ষেত্ৰী ৰাজহ চক্ৰৰ অন্তৰ্গত বৰতলা গাঁৱৰ সাংস্কৃতিক কৰ্মী মনমোহন বৈশ্যৰ প্ৰথমখন গল্পপুথি “আকাশৰ তৰা" মঙ্গলবাৰে হেঙুল থিয়েটাৰৰ মঞ্চত উন্মোচন কৰা হয় ৷

বৰতলা শংকৰদেৱ নামঘৰ প্ৰাংগণত মঙ্গলবাৰৰ পৰা চলি থকা হেঙুল থিয়েটাৰৰ মঞ্চত মনমোহন বৈশ্যৰ গল্পপুথি “আকাশৰ তৰা" উন্মোচন কৰে ভ্ৰাম্যমান থিয়েটাৰ তথা চলচ্চিত্ৰ জগতৰ বলিষ্ঠ অভিনেতা ৰবি শৰ্মাই ৷ বৰতলা গাঁৱৰ সাংস্কৃতিক কৰ্মী মাধৱ চৌধুৰীয়ে আঁত ধৰা গ্ৰন্থ উন্মোচনী অনুষ্ঠানত বৰক্ষেত্ৰী ৰাজহ চক্ৰ বিষয়া তথা কাৰ্যবাহী দণ্ডাধীশ কৌস্তভ ৰয় মুখ্য অতিথি হিচাপে উপস্থিত থাকে ৷

আকাশৰ তৰা উন্মোচন কৰি অভিনেতা ৰবি শৰ্মাই পাঠক - সমাজক গ্ৰন্থখন আঁকোৱালি ল'বলৈ আহ্বান জনায় আৰু লেখকগৰাকীক উৎসাহ - উদ্দীপনা আগবঢ়াবলৈ কয় ৷

পঢ়ুৱৈ- সমাজৰ মাজত মুকলি  কৰি দিয়া “আকাশৰ তৰা" গল্পপুথিখনৰ জড়িয়তে গল্পকাৰ মনমোহন বৈশ্যই পাঠক - সমাজৰ সঁহাৰি আৰু সহযোগিতা লাভ কৰিব বুলি আশা প্ৰকাশ কৰে অভিনেতা ৰবি শৰ্মাই ৷ বিগত দুই দহক ধৰি মনমোহন বৈশ্যই বিভিন্ন কাকত - আলোচনীত কবিতা, গল্প লিখি পাঠকৰ সমাদৰ বুটলি শেহতীয়াভাৱে প্ৰকাশ কৰিবলৈ সক্ষম হয় “আকাশৰ তৰা" শীৰ্ষক গল্পপুথিখন ৷

মনমোহন বৈশ্যই ইতিমধ্যেই “অভিশপ্ত ফুলশয্যা" নামেৰে এখন উপন্যাস, “কাৰাগাৰত মই" নামেৰে এখন গল্পপুথি আৰু “গেন্ধেলাৰ বিয়া" নামেৰে এখন একাংকিকা নাট লিখি পাঠক সমাজৰ বাবে সাজু কৰি তুলিছে । প্ৰকাশৰ পথত থকা উক্ত  গ্ৰন্থ কেইখন অচিৰেই  উন্মোচন কৰা হ'ব বুলিও লেখক মনমোহন বৈশ্যই জানিবলৈ দিয়ে ৷ উন্মোচনী অনুষ্ঠানত বৰক্ষেত্ৰী আঞ্চলিক পঞ্চায়তৰ সভাপতি প্ৰীতম গোস্বামীকে প্ৰমুখ্য কৰি ভালেকেইজন বিশিষ্ট লোক উপস্থিত থাকে ৷

Also Read: বিশ্বনাথত ধাৰাবাহিক চুৰিকাণ্ড : ব্যৰ্থ আৰক্ষী