ডিজিটেল সংবাদ, নগাঁও : বৃহত্বৰ উৰিয়াগাঁৱৰ শৈক্ষিক, সামাজিক, সাংস্কৃতিক দিশত জীৱনজোৰা সাধনা আগবঢ়োৱা চাৰি গৰাকী বৰন্য ব্যক্তিক ৰাজহুৱা সন্মান প্ৰদান কৰা হয় ৷ উৰিয়াগাঁও আঞ্চলিক উন্নয়ন সমিতি, উৰিয়াগাঁও জাতীয়তাবাদী যুৱ ছাত্ৰ পৰিষদ, উৰিয়াগাঁও ক্ষুদ্ৰ ব্যৱসায়ী সন্থাৰ যৌথ উদ্যোগত অনুষ্ঠিত হয় এই সন্মান প্ৰদান অনুষ্ঠান ৷
বৃহত্বৰ উৰিয়াগাঁও অঞ্চলৰ লগতে জিলা খনৰে নহয় সমগ্ৰ ৰাজ্যৰে এক পৰিচিত নাম হৈছে প্ৰসন্ন কুমাৰ গোস্বামী, অকন চন্দ্ৰ বৰা, জীৱন শইকীয়া আৰু বেদানন্দ মহন্ত ৷ নৱ প্ৰজন্মৰ বাবে শৈক্ষিক, সামাজিক, সাংস্কৃতিক আদি দিশত এক সুস্থিৰ পৰিৱেশ গঢ়োতা এই পুৰোধা ব্যক্তি কেইগৰাকীক আনুষ্ঠানিক ভাবে ৰাজহুৱাভাৱে সন্মান প্ৰদান কৰা হয় ৷
পোন প্ৰথমে ব্ৰহ্মচাৰী সত্ৰৰ সত্ৰাধিকাৰ, সংস্কৃত পণ্ডিত, শিক্ষাবিদ, সাহিত্যিক প্ৰসন্ন কুমাৰ গোস্বামীৰ বাসভৱনত প্ৰথমখন সভা অনুষ্ঠিত হয় ৷ গোস্বামীৰ কৰ্মময় জীৱনক সোঁৱৰণ কৰি বিহুৱান, শৰাই, চেলেঙ, সম্বৰ্ধনা পত্ৰ প্ৰদান কৰা হয় ৰাজহুৱাভাৱে ৷ ইয়াৰ পিছতে উৰিয়াগাঁও নিকামূল সত্ৰৰ নিবাসী অকন চন্দ্ৰ বৰাক ৰাজহুৱা সন্মান প্ৰদান কৰা হয় ৷ শিক্ষাবিদ বৰাৰ বাসভৱনত উপস্থিত হৈ তিনিওটিকৈ সংগঠনে শিক্ষাবিদ অকন চন্দ্ৰ বৰাক বিহুৱান, চেলেঙ, শৰাই, সম্বৰ্ধনা পত্ৰৰে সন্মানিত কৰে ৷ ইফালে ভোটাই গাঁৱৰ নিবাসী শিক্ষাবিদ, শিল্পী জীৱন শইকীয়াক ৰাজহুৱা সন্মান জনোৱা হয় ৷
শেষত ভোটাইগাঁও শ্ৰী শ্ৰী নগঞাঁ এলেঙী বালি সত্ৰত উৰিয়াগাঁও আঞ্চলিক উন্নয়ন সমিতি, জাতীয়তাবাদী যুৱ ছাত্ৰ পৰিষদ, ক্ষুদ্ৰ ব্যৱসায়ী সন্থাৰ প্ৰতিনিধি আৰু ৰাইজ উপস্থিত হয় ৷ সত্ৰাধিকাৰ, শিক্ষাবিদ, সমাজসেৱক বেদানন্দ মহন্তৰ বাসভৱনত ৰাইজ উপস্থিত হৈ ৰাজহুৱাভাৱে সন্মান প্ৰদান কৰা হয় ৷
বৰগীত পৰিৱেশনৰে অনুষ্ঠানটি অনুষ্ঠিত হয় ৷ মহন্তৰ বাসগৃহত অনুষ্ঠিত সভাখনিত বিহুৱান, চেলেঙ, শৰাই, সম্বৰ্ধনা পত্ৰৰে সন্মানিত কৰে ৷ ৰাজহুৱা সন্মান প্ৰদান অনুষ্ঠানটি নাৰায়ন বনিয়া, কমলেশ শইকীয়া, পীতাম্বৰ শইকীয়া, পদুম বৰুৱা, প্ৰাগজ্যোতিষ বনিয়া, ৰাজ হাজৰিকা আদি উপস্থিত থাকি পুৰোধা ব্যক্তি চাৰিওজনৰ কৰ্মময় জীৱন ওপৰত আলোকপাত কৰে ৷
