ডিজিটেল সংবাদ নগাঁও: নগাঁও চহৰৰ অগ্ৰণী চিত্ৰাংকন বিদ্যালয় প্ৰদীপ আৰ্ট এণ্ড ক্ৰাফ্টৰ কৃতিত্ব ৷ বিদ্যালয়খনৰ ছাত্ৰ-ছাত্ৰীয়ে ৰাষ্ট্ৰীয় পৰ্যায়ত অনুষ্ঠিত প্ৰতিযোগিতাত অংশগ্ৰহণ কৰি কঢ়িয়াই আনিছে সুনাম।
নগাঁও চহৰৰ আমোলাপট্টিত থকা প্ৰদীপ আৰ্ট এণ্ড ক্ৰাফ্টৰ ৯৮ গৰাকী ছাত্ৰ-ছাত্ৰীয়ে মুম্বাইস্থিত সংস্কৃতি আৰ্টৰ দ্বাৰা আয়োজিত ৰাষ্ট্ৰীয় পৰ্যায়ৰ এক প্ৰতিযোগিতাত অংশগ্ৰহণ কৰি বিভিন্ন শাখাত পুৰস্কাৰ লাভ কৰিবলৈ সক্ষম হৈছে ৷ অনলাইন যোগে আয়োজিত এই ৰাষ্ট্ৰীয় প্ৰতিযোগিতাখনিৰ নাম আছিল “ ইন্দ্ৰধনুচ- ২০২৩ “।
যোৱা ৩০ এপ্ৰিলত অনুষ্ঠিত হোৱা এই প্ৰতিযোগিতাখনিত আটাইকৈ বেছি সংখ্যক পুৰস্কাৰ নগাঁৱৰ প্ৰদীপ আৰ্ট এণ্ড ক্ৰাফ্টৰ ছাত্ৰ-ছাত্ৰীসকলে লাভ কৰিবলৈ সক্ষম হৈছে ৷ পুৰস্কাৰ লাভ কৰা ছাত্ৰ-ছাত্ৰীসকলক আনুষ্ঠানিক ভাবে মেডেল আৰু প্ৰমান পত্ৰ প্ৰদান কৰা হয় ৷
চহৰখনত থকা প্ৰদীপ আৰ্ট এণ্ড ক্ৰাফ্টৰ চৌহদত অধ্যক্ষ প্ৰদীপ মজুমদাৰ , অভিভাৱকসকলৰ উপস্হিতিত কৃতিত্ব অৰ্জন কৰা ছাত্ৰ-ছাত্ৰীসকলক লৈ এক শুভেচ্ছামূলক অনুষ্ঠান অনুষ্ঠিত হয় ৷
