ৰকিবুল হুছেইনৰ ফটোত লিখিলে 'বিজেপিৰ এজেন্ট', তামোলেৰে পিকালে সাংসদ প্ৰদ্যুৎ বৰদলৈৰ ফটোত, কোনে কৰিলে এই কাম?

ডিজিটেল সংবাদ,নগাঁও : নগাঁও জিলা কংগ্ৰেছৰ সভাপতি সুৰেশ বৰাই শুকুৰবাৰে পদত্যাগ কৰাৰ পিছতে অঘটন ৷ নিশা জিলা কংগ্ৰেছৰ কাৰ্যালয়ত কোনো দুস্কৃতিকাৰীয়ে সংঘটিত কৰিলে অঘটন ৷

নিশা কংগ্ৰেছ নেতা ৰকিবুল হুছেইনৰ ফটো সম্বলিত ফ্লেস্কৰ ফ্ৰেমত কলা ৰঙেৰে লিখিলে বিজেপি এজেন্ট বুলি ৷ বৰ বৰ হৰফৰে ৰকিবুল হুছেইনৰ ফটোত কাৰ্যালয়ৰ ভিতৰত এনেদৰে বিজেপিৰ এজেন্ট বুলি লিখা ঘটনাই চাঞ্চল্যৰ সৃষ্টি কৰিছে ৷ একেদৰে সাংসদ প্ৰদ্যুৎ বৰদলৈৰ ফটোৰ ফ্ৰেমত তামোলৰ পিক পেলোৱাৰ ঘটনা সংঘটিত হৈছে৷

ৰকিবুল হুছেইন আৰু প্ৰদ্যুৎ বৰদলৈৰ ফটো ফ্ৰেমত দুষ্কাৰ্য সংঘটিত কৰাৰ আঁৰত কোন জড়িত সেই কথা পোহৰলৈ অহা নাই ৷ কোনোৰ মতে ৰকিবুল আৰু প্ৰদ্যুতৰ সংঘাটৰ বাবে সুৰেশ বৰাই কংগ্ৰেছ ত্যাগ কৰিছে ৷

শেহতীয়াকৈ সাংসদ প্ৰদ্যুৎ বৰদলৈৰ সংগ ত্যাগ কৰিবলৈ অহা ভাবুকিৰ পৰিপ্ৰেক্ষিতত সুৰেশ বৰাই কংগ্ৰেছ ত্যাগ কৰা বুলি চৰ্চা চলিছে ৷ সুৰেশ বৰাই কংগ্ৰেছৰ পৰা পদত্যাগ কৰাৰ পিছতে শুক্ৰবাৰে বিয়লি ভাগত সাংসদ বৰদলৈ বৰাৰ বাসভৱনত উপস্থিত হৈছিল ৷ ইফালে নগাঁও কংগ্ৰেছৰ ভিতৰৰ এই সংঘাটৰ সময়তে বিধায়ক ৰকিবুল হুছেইনে নগাঁও এৰি ৰাজস্থানত আছেগৈ ৷ ইয়াৰ মাজতে আজি সুৰেশ বৰাই বিজেপি দলত যোগ দিব ৷

Also Read: উন্নয়নৰ নমুনা! ঠেলাত উঠাই চিকিৎসালয়লৈ নিলে ৰোগীক...