ডিজিটেল সংবাদ, নগাঁওঃ নগাঁও জিলা প্ৰশাসনৰ ব্যৱস্থাপনাত ৰাষ্ট্ৰীয় খাদ্য সুৰক্ষা আইন (NFSA)ৰ অধীনত ৰেচন কাৰ্ডপ্ৰাপ্ত নগাঁও সদৰ বিধানসভা সমষ্টিৰ হিতাধিকাৰীসকলক আনুষ্ঠানিকভাৱে আয়ুষ্মান-ভাৰত প্ৰধানমন্ত্ৰী জন আৰোগ্য যোজনা আৰু আয়ুষ্মান-অসম মুখ্যমন্ত্ৰী জন আৰোগ্য যোজনাৰ কাৰ্ড বিতৰণ কৰা হয় । শনিবাৰে জিলা পুথিভঁৰালৰ প্ৰেক্ষাগৃহত এই কাৰ্ডসমূহৰ বিতৰণ কৰা হয় । আজিৰ সভাত আদৰণি ভাষণ আগবঢ়াই জিলা উন্নয়ন আয়ুক্ত সত্যজিৎ চেতিয়াই ।
সভাত জিলা উপায়ুক্ত নৰেন্দ্ৰ কুমাৰ শ্বাহে নিজৰ ভাষণত জিলাখনৰ এই কাৰ্ডৰ হিতাধিকাৰী সকলে চিকিৎসা ক্ষেত্ৰত লাভ কৰিবলগীয়া সুবিধা সমূহৰ বিষয়ে সভাত অৱগত কৰে । আজিৰ এই অনুষ্ঠানত উপস্থিত থাকে বিধায়ক ৰূপক শৰ্মা ।
বিধায়কগৰাকীয়ে ভাষণ প্ৰদান কৰি কয় যে বর্তমানৰ কেন্দ্ৰীয় আৰু ৰাজ্য চৰকাৰখনে দৰিদ্ৰ জনসাধাৰণৰ স্বাস্থ্যৰ ক্ষেত্ৰত গ্ৰহণ কৰা পদক্ষেপৰ ওপৰত বক্তব্য আগবঢ়াই । উল্লেখযোগ্য যে এই সভাতে নগাঁও সদৰ বিধানসভা সমষ্টিৰ অন্তৰ্গত ১০ গৰাকী হিতাধিকাৰীক আনুষ্ঠানিকভাৱে আয়ুষ্মান কাৰ্ড প্ৰদান কৰা হয় ।
কাৰ্ড বিতৰণ অনুষ্ঠানত নগাওঁ জিলা পৰিষদৰ মুখ্য কাৰ্যবাহী বিষয়া অনন্ত কুমাৰ গগৈ, জিলা স্বাস্থ্য সেৱাৰ যুটীয়া সঞ্চালক ডাঃ অৰূপ জ্যোতি মহন্ত, নগাওঁ পৌৰ-সভাৰ সভানেত্ৰী অম্বিকা মজুমদাৰ, নগাওঁ উন্নয়ণ প্ৰাধিকৰণৰ ভাপতি ধ্ৰুৱ জ্যোতি শর্মাকে প্ৰমুখ্য কৰি জিলা প্ৰশাসন আৰু স্বাস্থ্য বিভাগৰ বিষয়া-কৰ্মচাৰীসকলৰ লগতে এই কাৰ্ডৰ হিতাধিকাৰীসকল আৰু বহুসংখ্যক ৰাইজ উপস্থিত থাকে ।
