ডিজিটেল সংবাদ কামপুৰঃ ৰাজ্য চৰকাৰে বাল্য বিবাহৰ বিৰুদ্ধে কঠোৰ স্থিতি গ্ৰহণ কৰাৰ পাছতো সজাগ আৰু সচেতন হোৱা নাই একাংশ পিতৃ-মাতৃ ৷ তাৰ উদাহৰণ পোৱা গ'ল কামপুৰত।
কামপুৰ দেবনাৰিকলি গাঁৱৰ এগৰাকী ১৭ বছৰীয়া নাবালিকাক আটিগাঁৱৰ ৰিন্টু কলিতা নামৰ এজন যুৱকৰ লগত বিয়া দিয়াৰ ব্যৱস্থা কৰিছিল ৷ সেই মৰ্মে বিয়াৰ সকলো ব্যৱস্থা কৰিলে পিতৃ মাতৃয়ে ৷
ৰভাতলিত আয়তীৰ উৰুলি, ব্যৱস্থা কৰা হ'ল অতিথি আপ্ৰায়নৰ বাবে বিধে বিধে খাদ্য সামগ্ৰী ৷ কইনা ঘৰত সকলোৰে অপেক্ষা বৰযাত্ৰীলৈ ৷ কিন্তু দৰাৰ লগত বৰযাত্ৰী নগৈ কইনা ঘৰত উপস্থিত হ'ল আৰক্ষী আৰু শিশু সুৰক্ষা সমিতি (CHILD LINE)ৰ লোক ৷
ৰভা তলিৰ পৰা নাবালিকা কইনাক উদ্ধাৰ কৰাৰ লগতে আটক কৰিলে কইনাৰ পিতৃক৷ আনহাতে দৰাৰূপী ৰিন্টু কলিতা নামৰ যুৱক জনকো আটক কৰিছে কামপুৰ আৰক্ষীয়ে ৷ বৰ্তমান কামপুৰ আৰক্ষী থানাত সোধপোচ অব্যাহত ৰাখিছে তেওঁলোকক ৷
