ডিজিটেল সংবাদ, বটদ্ৰৱাঃ নগাঁও জিলাৰ বটদ্ৰৱাৰ নিকটৱৰ্তী বৃহত্তৰ ৰাইডঙীয়া অঞ্চলত বিগত ২৫ বছৰে কণ কণ ছাত্ৰ-ছাত্ৰীৰ মাজত সংগীত নৃত্য কলাৰ প্ৰশিক্ষণ দি অহা ভাতখাণ্ডেৰ অধীনৰ শিক্ষানুষ্ঠান "সংগীত কানন"ৰ ৰূপালী জয়ন্তী উপলক্ষে দেওবাৰে দিনজোৰা কাৰ্যসূচীৰে বিশেষ অনুষ্ঠান অনুষ্ঠিত হয়। পুৱা ৯ বজাত সৌৰভ শাখা সভাৰ প্ৰাক্তন সভাপতি ধীৰচিং পাটৰে পতাকা উত্তোলন কৰাৰ লগতে বিশিষ্ট নিবন্ধকাৰ মানৱ অধিকাৰ কৰ্মী লাচিত বৰদলৈয়ে স্মৃতি তৰ্পন কৰি দিনটোৰ কাৰ্যসূচী শুভাৰম্ভ কৰে।
বিয়লি ৩ বজাত ছাত্ৰ-ছাত্ৰীৰ মাজত চিত্ৰাংকন প্ৰতিযোগিতা অনুষ্ঠিত হয়। এই "সংগীত কানন"ৰ ৰূপালী জয়ন্তী উপলক্ষে সন্ধিয়া সাংস্কৃতিক বিদ্যালয়খনৰ ছাত্ৰ-ছাত্ৰীসকলৰ দ্বাৰা এটি মনোমোহা সাংস্কৃতিক অনুষ্ঠান অনুষ্ঠিত কৰা হয়। সাংস্কৃতিক অনুষ্ঠানটি শুভ উদ্বোধন কৰে কনচেপ্ট জুনিয়ৰ কলেজৰ শিক্ষক প্ৰফুল্ল বৰাই।
কবিন পাটৰে আঁত ধৰা অনুষ্ঠানটিত সংগীত কাননৰ পৰিচালক সপোন ভূঞা, সমাজকৰ্মী ক্ৰমে দিলীপ কুমাৰ বৰা, লাচিত বৰদলৈ, নৱকমল ৰাজা, শিক্ষক-শিল্পী বুধেন চন্দ্ৰ বৰা, শংকৰ জ্যোতি শৰ্মা, দিপান্বিতা গোস্বামী, যতীন পাটৰ, মুন ভূঞা, পংকজ পাঠককে আদি কৰি ৫শতাধিক লোক উপস্থিত থাকে। গাম্ভীৰ্যপূৰ্ণ অনুষ্ঠানটিত "সংগীত কানন"ৰ ছাত্ৰ-ছাত্ৰীসকলে বৰগীত, তবলাৰ লহৰা, সমবেত সংগীত, ভূপেন্দ্ৰ সঙ্গীত, অসমীয়া চিৰযুগমীয়া গীত, সত্রীয়া নৃত্য, বিহু নৃত্য, কবিতা আবৃত্তি আদি বিভিন্ন সাংস্কৃতিক কাৰ্যসূচী পৰিবেশন কৰে।
