ডিজিটেল সংবাদ , নগাঁও : মহাপুৰুষ শ্ৰীমন্ত শঙ্কৰদেৱ বিশ্ববিদ্যালয়ৰ পঞ্চম সমাৱৰ্তনখনি অহা ২৭ এপ্ৰিলত গুৱাহাটীৰ ৰূপনগৰস্থিত বিশ্ববিদ্যালয়খনৰ চৌহদত অনুষ্ঠিত হ’ব ৷ উক্ত অনুষ্ঠানত মুখ্য অতিথি হিচাপে উপস্থিত থাকি ডিগ্ৰী প্ৰদান কৰাৰ লগতে সভাপতিত্ব কৰিব ৰাজ্যৰ ৰাজ্যপাল তথা বিশ্ববিদ্যালয়খনৰ ভিজিটৰ গুলাব চান্দ কাটাৰিয়াই ৷
বিশ্ববিদ্যালয়খনৰ পঞ্জীয়ক অধ্যাপক মৃণাল কুমাৰ বৰাই জনোৱা মতে, প্ৰথমবাৰৰ বাবে দুগৰাকী বিশিষ্ট ব্যক্তিলৈ বিশ্ববিদ্যালয়খনে ডি.লিট সন্মান আগবঢ়াব ৷ এই সন্মান গ্ৰহণ কৰিব বিশিষ্ট শিক্ষাবিদ তথা সমাজসেৱক ড° অচ্যুত চামান্ট আৰু ৰাজ্যৰ বিশিষ্ট শিক্ষাবিদ, সাহিত্যিক-অধ্যাপক ভৱ প্ৰসাদ চলিহাই ৷
আনহাতে, এই সমাৱৰ্তনত ২২ গৰাকী পি এইচ ডি, ১৪ গৰাকীক এম. ফিল সন্মান প্ৰদান কৰাৰ লগতে আন ৪৫২ গৰাকী স্নাতক-স্নাতকোত্তৰ মহলা উৰ্ত্তীৰ্ণ ছাত্ৰ-ছাত্ৰীক ডিগ্ৰী প্ৰদান কৰা হ’ব ৷ উল্লেখযোগ্য, এই অনুষ্ঠানত সন্মানীয় অতিথি হিচাপে ভাৰত চৰকাৰৰ বৈদেশিক পৰিক্ৰমা আৰু শিক্ষা মন্ত্ৰালয়ৰ ৰাজ্যিক মন্ত্ৰী সন্মানীয় ড° ৰাজকুমাৰ ৰঞ্জন সিং উপস্থিত থাকিব ৷
ডিগ্ৰী গ্ৰহণ কৰিবলগা বিশ্ববিদ্যালয়ৰ সকলো প্ৰাক্তন শিক্ষাৰ্থীকে অহা ২৪ এপ্ৰিলৰ ভিতৰত বিশ্ববিদ্যালয়ৰ ৱেবছাইট যোগে সমাৱৰ্তনৰ প্ৰ-পত্ৰ পূৰণ কৰিবলৈ পঞ্জীয়কগৰাকীয়ে আহ্বান জনায় ৷
