ডিজিটেল সংবাদ ,নগাঁওঃ নগাঁও চহৰৰ অসমীয়া মাধ্যমৰ অগ্ৰণী শিক্ষানুষ্ঠান নৱৰূপ জাতীয় বিদ্যাপীঠৰ শুকুৰবাৰে একৈশ সংখ্যক প্ৰতিষ্ঠা দিৱস বৰ্ণাঢ্য কাৰ্যসূচীৰে উদযাপন কৰা হয় ৷ প্ৰতিষ্ঠা দিৱসৰ লগত সঙ্গতি ৰাখি অসমৰ তিনিগৰাকী বিশিষ্ট ব্যক্তিৰ নামত উৎসৰ্গিত নীলকান্ত বৰুৱা বিজ্ঞান পৰীক্ষাগাৰ (ৰসায়ন বিজ্ঞান আৰু পদাৰ্থ বিজ্ঞান), কবি-সমালোচক, অধ্যাপক ভবেন বৰুৱা আৰু অভিযন্তা- ঔপন্যাসিক আৰু লেখিকা গীতা হাঞ্ছেপী শ্ৰেণী কক্ষ উন্মোচন কৰি শিক্ষাৰ্থীসকলৰ কাৰণে মুকলি কৰা হয়৷
ডিফুৰ অজিত ছিংনাৰ আৰু গীতা হাঞ্ছেপীৰ লগতে শিক্ষাবিদ-নাৰী শিক্ষাৰ বাটকটীয়া নীলকান্ত বৰুৱা আৰু অধ্যাপক-কবি ভবেন বৰুৱাৰ পৰিয়ালৰ কুৰিৰো অধিক সন্মানীয় সদস্যৰ উপস্থিতিত তেখেতসকলৰ নিজ হাতেৰে শ্ৰেণী কক্ষ আৰু বিজ্ঞান পৰীক্ষাগাৰৰ শুভ উন্মোচন কৰা হয় ৷ বিদ্যানুৰাগী, সম্ভ্ৰান্ত পৰিয়ালৰ অৰ্থ সাহায্যৰে নিৰ্মিত এই তিনিটা শ্ৰেণী কক্ষৰ সংযোজনে নৱৰূপ জাতীয় বিদ্যাপীঠৰ শৈক্ষিক আন্ত:গাঁথনিক অধিক মজবুত কৰিলে৷ বিদ্যাপীঠৰ কৰ্তৃপক্ষৰ ধাৰণা যে অসমৰ শিক্ষা, সংস্কৃতি, সমাজ, সাহিত্য ক্ষেত্ৰত অসামান্য অৰিহণা আগবঢ়োৱা বৰেণ্য বিদ্বান ব্যক্তিসকলৰ নামত উৎসৰ্গিত এই শৈক্ষিক আন্ত:গাঁথনিয়ে আমাৰ উদীয়মান শিক্ষাৰ্থীসকলক অসমীয়া বৌদ্ধিক চেতনা আৰু ঐতিহ্যৰে সংপৃক্ত হৈ থাকিবলৈ প্ৰেৰণা যোগাব৷
অনুষ্ঠানৰ আৰম্ভণিতে বিদ্যাপীঠৰ পতাকা উত্তোলন কৰি সভাপতি ড: কমল শইকীয়াই চমু ভাষণেৰে সংশ্লিষ্ট সকলোৰে একনিষ্ঠ সেৱা আৰু ত্যাগৰ বাবে অভিবাদন জনায় আৰু ছাত্ৰ-ছাত্ৰী সকলক উপযুক্ত শিক্ষা আৰু একাগ্ৰ সাধনাৰে আগবাঢ়িবলৈ আহ্বান জনায়৷নৱৰূপ জাতীয় বিদ্যাপীঠৰ সচিব মুনীন্দ্ৰ শইকীয়া, প্ৰধান শিক্ষয়িত্ৰী নিভা শইকীয়া, ৰেক্টৰ সংগীতা বৰুৱা,অধ্যক্ষা উৎপলা বৰা আৰু শিক্ষক শিক্ষয়িত্ৰীৰ সহযোগত বিভিন্ন ক্ষেত্ৰত উৎকৰ্ষতা প্ৰদৰ্শন কৰা ছাত্ৰ-ছাত্ৰীক গুণাভিৰাম বৰুৱা বঁটা, আনন্দ ৰাম ঢেকিয়াল ফুকন বঁটা আৰু হেমচন্দ্ৰ বৰুৱা বঁটা প্ৰদান কৰা হয় ৷
সাংস্কৃতিক অনুষ্ঠানৰ পাছতে বিদ্যাপীঠৰ শিক্ষাৰ্থীসকলে খোল বাদনেৰে বিশিষ্ট অতিথি সকলক উষ্ম আদৰণি জনায়৷ শ্ৰেণী কক্ষ উন্মোচনৰ পাছত নৱউন্মোচিত ভবেন বৰুৱা কক্ষত তিনিওটা পৰিয়ালৰ প্ৰতিনিধি, স্থানীয় নাগৰিক, শিক্ষক অভিভাৱকৰ উপস্থিতিত এখন মুকলি সভা অনুষ্ঠিত হয়৷সভাত বিশিষ্ট সমালোচক প্ৰভাত বৰা, সংশ্লিষ্ট পৰিয়ালৰ তৰফৰ পৰা ডা° জয়ন্ত বৰুৱা, উপলা বৰুৱা, অঞ্জনা চলিহা,ডা: মৃগাঙ্ক শেখৰ চলিহা, কমল শইকীয়া, জীৱন নৰহে এই তিনিওগৰাকী বিশিষ্ট ব্যক্তিৰ জীৱন আৰু কৰ্মৰ ওপৰত আলোকপাত কৰি বক্তব্য ৰাখে ৷ সভাত বিশিষ্ট গল্পকাৰ শিৱানন্দ কাকতি,কবি ডা: প্ৰয়াগ শইকীয়া,প্ৰদীপ শইকীয়া,ড: বিপুল মালাকাৰ, ডিফুৰ বিশিষ্ট সাংবাদিক সঞ্জু বৰা,ভৱ প্ৰসাদ দেউৰীকে গণ্য মান্য ব্যক্তি সকল উপস্থিত থাকে।
