ডিজিটেল সংবাদ, কলিয়াবৰঃ গেৰুকামুখৰ নিৰ্মিয়মান এন এইচ পি চিৰ প্ৰজেক্টলৈ সৰবৰাহ কৰা চিমেন্টৰ চোৰাং বেহাই সম্প্ৰতি সচেতন মহলক স্তম্ভিত কৰি তুলিছে । কলিয়াবৰ মহকুমাৰ উলুৱনী আৰক্ষীয়ে শুকুৰবাৰে বিয়লি আদবাটতে চিমেন্ট হৰলুকি কৰা চিমেন্টৰ চোৰাং বেপাৰীক আটক কৰে ।
নলতলীৰ সমীপৰ হাতীয়েখোৱাৰ ৩৭ নম্বৰ 'ক' ৰাষ্ট্ৰীয় ঘাই পথৰ পৰা চোৰাং ব্যৱসায়ীগৰাকীক আৰক্ষীয়ে আটক কৰিবলৈ সক্ষম হয় । লংকাৰ পৰা গেৰুকামুখৰ এন এইচ পি চিলৈ ডালমিয়া চিমেন্ট ভৰ্ত্তি এ এছ ০১ এন চি ৯৩৩১ নম্বৰৰ ট্ৰাকখনৰ পৰা চিমেন্ট ক্ৰয়-বিক্ৰয় কৰা অৱস্থাতে ট্ৰাকখনৰ চালকৰূপী বিক্ৰেতা নৃপেন ফুকনক আটক কৰে আৰক্ষীয়ে ।
ধৃত নৃপেনৰ স্বীকাৰোক্তিৰ ভিত্তিত চোৰাংকৈ চিমেন্ট ক্ৰয় কৰা বুবু নাথক আটক কৰি উদ্ধাৰ কৰে দহবেগ চিমেন্ট । আৰক্ষীয়ে চোৰাংকৈ চিমেন্ট ক্ৰয় কৰি লৈ যোৱা বলেৰ' পিকআপ গাড়ীখনৰ সন্ধানত অব্যাহত ৰাখিছে অভিযান ।
