ঢকুৱাখনা সমষ্টি আৰক্ষণমুক্ত দাবী সমিতিৰ স্মাৰকপত্ৰ প্ৰদান

ডিজিটেল সংবাদ, ঢকুৱাখনা : ৰাজ্যখনত বসবাস কৰা অজনজাতীয় জাতি ,সম্প্ৰদায়ৰ সাংবিধানিক অধিকাৰ খৰ্ব কৰি প্ৰস্তাৱিত মিচিং স্বায়ত্ব শাসিত পৰিষদৰ সীমাৰ ভিতৰত অজনজাতীয় গাঁও অন্তৰ্ভূক্তিকৰণৰ প্ৰতিবাদ জনোৱা হয় । ৭৭ নং ঢকুৱাখনা বিধানসভা সমষ্টিৰ আৰক্ষণমুক্ত দাবী সমিতিৰ উদ্যোগত এই প্ৰতিবাদ সাব্যস্ত কৰা হয় ।

মিচিং জনগোষ্ঠীক সংবিধানৰ ষষ্ঠ অনুসূচীৰ স্বীকৃতি প্ৰদানৰ বাবে নীতিবৰ্হিভূতভাৱে অজনজাতীয় গাঁৱক অন্তৰ্ভুক্ত কৰাৰ সবল প্ৰতিবাদ জনাই সোমবাৰে লখিমপুৰ জিলাৰ আয়ুক্তলৈ এক স্মাৰকপত্ৰ প্ৰেৰণ কৰা হয় । দাবী সমিতিৰ কাৰ্যকৰী সভাপতি পদ্মেশ্বৰ কোচ , সম্পাদক চুছেন গগৈ ,উপদেষ্টা ভদ্ৰ গগৈ আৰু সহকাৰী সম্পাদক গোবিন বৰুৱাৰ নেতৃত্বত যোৱা এটা সঁজাতি দলে ঢকুৱাখনা মহকুমাৰ ভাৰপ্ৰাপ্ত মহকুমাধিপতি মিতাবৃন্দা গগৈৰ জৰিয়তে জিলা আয়ুক্তলৈ এখন স্মাৰক পত্ৰ প্ৰেৰণ কৰে ।

সঁজাতি দলটোৱে মিচিং স্বায়ত্ব শাসিত পৰিষদৰ সীমা নিৰ্ধাৰণৰ বেলিকা বিধানসভা সমষ্টিটোৰ ঢকুৱাখনা ,সোৱণশিৰী আৰু কদম ৰাজহ চক্ৰৰ প্ৰায় ৩০ খন অজনজাতীয় নাগৰিকৰ অধ্যুষিত গাঁও অন্তৰ্ভুক্ত কৰা বুলি তথ্যসহ অভিযোগ উত্থাপন কৰি অজনজাতীয় নাগৰিকৰ অধিকাৰ খৰ্ব কৰি এনে বলপূৰ্বক অন্তৰ্ভূক্তিকৰণ কোনো কাৰণতে মানি লোৱা নহ'ব বুলি সকীয়াই দিয়ে সমিতিয়ে ।

সমিতিৰ নেতৃবৰ্গই কয়- ১৯৬২ চনৰ পৰাই সমষ্টিটোৰ অজনজাতীয় নাগৰিকে চৰকাৰী প্ৰতাৰণাৰ বলি হৈ হেৰুৱাই আহিছে জন প্ৰতিনিধিত্বৰ অধিকাৰ । বিধানসভা সমষ্টিটো সংৰক্ষণৰ নামত বিধি বৰ্হিভূতভাৱে অজনজাতীয় ৰাইজৰ মৌলিক অধিকাৰ খৰ্ব কৰি অহাৰ অভিযোগ উত্থাপন কৰি পুনৰ পৰিষদৰ এলেকাৰ ভিতৰত সোমাই এনে দাসত্বৰ বোজা বহন নকৰাৰ সকীয়নী দি চৰকাৰ প্ৰশাসনে তৎকালে এই অজনজাতীয় বসতি প্ৰধান গাঁওসমূহৰ নাম কৰ্তন কৰাৰ ব্যৱস্থা কৰাৰ দাবী জনায় ।

Also Read: লংকাৰ কাকীত স্মাৰ্ট মিটাৰৰ বিৰুদ্ধে ৰাজপথলৈ ওলাই আহিল শতাধিক মহিলা