প্ৰতিদিন ডিজিটেল সংবাদ, লখিমপুৰঃ শিঙৰা নদীৰ বানত বেয়াকৈ ক্ষতিগ্ৰস্ত নাওবৈচাৰ কোঁৱৰপুৰ, চমুৱা গাঁও, কলাখোৱা আদি গাঁৱত বানৰ পাছত বিভিন্ন ৰোগে দেখা দিছে ৷ বানপানী শুকাই যোৱাৰ লগে লগেই জ্বৰ,কাঁহ ,পানী লগা, টায়ফয়ড , এনকেফেলাইটিছ আদি ৰোগৰ পাদুৰ্ভাৱ বৃদ্ধি পাইছে ৷ লখিমপুৰ জিলা স্বাস্থ্য বিভাগৰ ফালৰ পৰা বনাৰ্ত সকলৰ বিনামুলীয়া স্বাস্থ্য পৰীক্ষাৰ লগতে চিকিৎসাৰ ব্যৱস্থা কৰা হৈছে ৷
ইয়াৰ ওপৰিও বিভিন্ন সংস্থা, সংগঠনে চিকিৎসা শিবিৰ অনুষ্ঠিত কৰিছে ৷ সোমবাৰে নাওবৈচা মহাবিদ্যালয়ৰ এ কিউ এ চি কোষ আৰু এন চি চি ৰ উদ্যোগত নাওবৈচাৰ কোঁৱৰপুৰত এক বিনামূলীয়া স্বাস্থ্য সেৱা শিবিৰ অনুষ্ঠিত কৰে ৷ সমন্বয়ক মাধৱ বৰাৰ নেতৃত্বত আয়োজিত চিকিৎসা শিবিৰত মহাবিদ্যালয়ৰ অধ্যক্ষ ড° গুনীন্দ্ৰ নাথ শৰ্মাৰ লগতে অধ্যাপক সকল উপস্থিত থাকে ৷ কোঁৱৰপুৰ গাঁৱৰ ২০০ টা পৰিয়ালক বিনামূলীয়া চিকিৎসা প্ৰদান কৰাৰ লগতে ঔষধ বিতৰণ কৰে ৷
