ডিজিটেল সংবাদ, যোৰহাটঃ বুধবাৰে যোৰহাটৰ জগন্নাথ বৰুৱা বিশ্ববিদ্যালয়ত এখন তিনি দিনীয়া আন্তৰাষ্ট্ৰীয় আলোচনা সত্ৰ আৰু কৰ্মশালা অনুষ্ঠিত হয় ৷ বিশ্ববিদ্যালয় খনৰ ভু-তত্ত্ব বিভাগৰ সৈতে আমেৰিকা যুক্তৰাষ্ট্ৰৰ "জৰ্জিয়া ইনষ্টিটিউটত অৱ টেকনলজি" আৰু "ৱেষ্টাৰ্ন ৱাশ্বিংটন ইউনিভাৰচিটি"ৰ সৈতে সম্পাদন হোৱা শৈক্ষিক বুজাবুজিৰ চুক্তিৰ অন্তৰ্গত এই তিনিদিনীয়া কৰ্মশালা ৷
উদ্বোধনী অনুষ্ঠানত বিশ্ববিদ্যালয়ৰ হৈ মুৰব্বী ড° উৎপলজ্যোতি মহন্তই আদৰণি জনোৱাৰ পাচত ভু-তত্ব বিভাগৰ মুৰব্বী অধ্যাপক ড° নুৰুল আমিনে উদ্বোধনী বক্তব্য আগবঢ়ায় ৷ জৰ্জিয়া ইনষ্টিটিউটত অৱ টেকনলজিৰ ছাত্ৰ বিনিময় কাৰ্যসূচীৰ সঞ্চালক ড° কাৰ্ল লাঙে এটি ভিডিঅ' শুভেচ্ছা বাৰ্তা আগবঢ়োৱাৰ পাছত বেষ্টাৰ্ণ ৱাশ্বিংটন বিশ্ববিদ্যালয়ৰ অধ্যাপক ড° পল বেটকা আৰু জৰ্জিয়া ইনষ্টিটিউটত অৱ টেকনলজিৰ বিজ্ঞানী ড° এচলিন ৰেনল্ডে বক্তব্য আগবঢ়ায়৷
এই অনুষ্ঠানতে বিদ্যাৰ্থী বিনিময় কাৰ্যসূচীৰযোগে আমেৰিকাৰ বিশ্ববিদ্যালয়ত হ্ৰস্বকালীন অধ্যয়নৰ বাবে নিৰ্বাচিত হোৱা জগন্নাথ বৰুৱা বিশ্ববিদ্যালয়ৰ ছাত্ৰ-ছাত্ৰী সকলক অভিভাৱক সকলৰ উপস্থিত আমন্ত্ৰণ পত্ৰ প্ৰদান কৰা হয়৷ ড° পল বেটকা আৰু ড° এচলিন ৰেনল্ডে সমল ব্যক্তি হিচাপে অংশ লোৱা আলোচনা সত্ৰ তথা কৰ্মশালা খনত বিভাগীয় ছাত্ৰ-ছাত্ৰীৰ লগতে ভাৰতৰ বিভিন্ন বিশ্ববিদ্যালয়ৰ বিদ্যাৰ্থী আৰু গৱেষকে অংশগ্ৰহণ কৰে৷ তিনিদিনীয়া কৰ্মশালাৰ অন্তত এটি ক্ষেত্ৰঅধ্যয়নৰ বাবে সমূহ গৱেষক কাষৰীয়া ৰাজ্য নাগালেণ্ডলৈ যাত্ৰা কৰিব৷
আমেৰিকাৰ বিশ্ববিদ্যালয় সমূহৰ লগত ভৱিষ্যতেও এনে শৈক্ষিক সহযোগিতাৰ যোগেদি নতুনকৈ উন্নীত জগন্নাথ বৰুৱা বিশ্ববিদ্যালয়ে ৰাজ্যখনৰ শৈক্ষিক জগতত ইতিবাচক পৰিবৰ্তন আনিবলৈ সক্ষম হ'ব বুলি সচেতন মহলে আশা কৰিছে৷