ডিজিটেল সংবাদ, জামুগুৰিহাটঃ জামুগুৰিহাটৰ টৌভঙা মিছিং গাঁৱত অঘটন। সোমবাৰে গাঁওখনৰ যাদৱ নৰহ (৪৫) নামৰ এজন লোকে বিয়লি নিজ ঘৰত বিদ্যুৎ সংযোগৰ কাম কৰি থকা অৱস্থাত বিদ্যুৎপৃষ্ট হৈ গুৰুতৰভাবে আহত হয় ৷ পৰিয়ালৰ লোকে ততাতৈয়াকৈ লোকজনক স্থানীয় উত্তৰ জামুগুৰি চিকিৎসালয়লৈ নিয়ে যদিও চিকিৎসকে সংকটজনক অৱস্থাত যাদৱ নৰহক উন্নত চিকিৎসাৰ বাবে তেজপুৰলৈ প্ৰেৰণ কৰে ৷
পিছে তেজপুৰ মিচন হাস্পতাল গৈ পোৱাত চিকিৎসকে পৰীক্ষা কৰি মৃত বুলি ঘোষণা কৰে নৰহক ৷ এই ঘটনাই অঞ্চলজুৰি সৃষ্টি কৰিছে চাঞ্চল্যৰ। উল্লেখ্য যে, তেজপুৰ আৰক্ষীয়ে যাদৱ নৰহৰ মৃতদেহ মৰণোত্তৰ পৰীক্ষাৰ বাবে তেজপুৰ চিকিৎসা মহাবিদ্যালয়লৈ প্ৰেৰণ কৰিছে ৷ অতি দৰিদ্ৰ পৰিয়ালটিৰ উপাৰ্জনৰ একমাত্ৰ ব্যক্তিগৰাকীয়ে মৃত্যুৰ সময়ত পত্নীসহ দুই কন্যা সন্তানক ইহসংসাৰত এৰি থৈ যায় ৷ সৰবৰহী ব্যক্তিগৰাকীয়ে এনেদৰে অকাল মৃত্যুক সাৱতি লোৱা ঘটনাই অঞ্চলটোত শোকৰ ছাঁ পেলাইছে৷
