ডিজিটেল সংবাদ,কলিয়াবৰ: এটুপি বিশুদ্ধ পানীৰ যোগান ধৰাটো এখন দেশৰ সুস্থ অৰ্থনীতিৰ মেৰুদণ্ডস্বৰূপ হোৱা সত্বেও পূৰ্বতে এই বিষয়টোক অগ্ৰাধিকাৰ দিয়া পৰিলক্ষিত হোৱা নাছিল৷ কিন্তু ২০১৯ চনত দেশৰ ৭৩সংখ্যক স্বাধীনতা দিৱস উদযাপনত লালকিল্লাৰ পৰা দেশবাসীক সম্বোধন কৰি প্ৰধানমন্ত্ৰী নৰেন্দ্ৰ মোডীয়ে ঘোষণা কৰিছিল যে, অনাগত সময়ত ভাৰতত জল জীৱন মিছন (JJM)ক পূৰ্ণোদ্যমে আগুৱাই নিয়া হ’ব৷
জল জীৱন মিছনৰ সফল ৰূপায়ণেৰে ২০২৪ চনৰ ভিতৰত দেশৰ গ্ৰামাঞ্চলত বসবাস কৰা প্ৰতিটো পৰিয়ালক দৈনিক ৫৫ লিটাৰ বিশুদ্ধ খোৱা পানী ঘৰে ঘৰে নল সংযোগৰ জৰিয়তে যোগান ধৰাৰ পৰিকল্পনা কৰা হৈছে ৷ জনস্বাস্থ্য কাৰিকৰী বিভাগে কলিয়াবৰৰ গাখীৰ খাইটিত স্থাপন কৰা পানী যোগান আঁচনি খনৰ জড়িয়তে ‘হৰ ঘৰ জলৰ লক্ষ্যৰে বান বিধ্বস্ত গঞা জনসাধাৰণৰ জীৱনত এক বৃহৎ পৰিৱৰ্তন আনিবলৈ সক্ষম হৈছে ৷
আৰ্থিকভাৱে পিছপৰা সমাজৰ একেবাৰে অন্তিমগৰাকী ব্যক্তিৰ উপৰিও পূৰ্বতে পানীৰ যোগান নোপোৱা সকলোকে JJM-ৰ অধীনত সামৰি লোৱা হৈছে। চৰকাৰৰ এই অভিলাষী আঁচনিৰ সফল ৰূপায়ণে অঞ্চলটোৰ ৰাইজৰ দীৰ্ঘদিনীয়া বিশুদ্ধ খোৱা পানীৰ অভাৱ দূৰ কৰাত গাঁওবাসী এতিয়া উৎফুল্লিত হৈ পৰিছে৷ l
মঙ্গলবাৰে গাখীৰ খাইটিৰ পানী যোগান আঁচনি খন উদ্বোধন কৰি স্বাস্থ্য মন্ত্ৰী কেশৱ মহন্তই কয়-বান বিধ্বস্ত বৃহত্তৰ অঞ্চলৰ ৰাইজক এই আঁচনিখনে যথেষ্ট ঊপকৃত কৰিব৷ ইয়াৰ লগতে মন্ত্ৰী গৰাকীয়ে ৪৫০ টা ঘৰ উপকৃত হোৱাকৈ লক্ষনাবন্ধা,বৰভগীয়া আৰু কাৱৈমাৰীৰ পানীযোগান আঁচনি কেইখন উদ্বোধন কৰি ৰাইজৰ নামত উৎৰ্সগা ।
আনহাতে অবিৰত পানী যোগান সেউজীয়া শস্যভূমিৰ উৰ্বৰা শক্তি শ্ল’গানৰে আজি জলসিঞ্চন বিভাগৰ কলিয়াবৰ-চামগুৰি সংমণ্ডলত সৌৰচালিত মধ্যম গভীৰ নলীনাদ আঁচনিৰ অধীনত নিৰ্মাণ কৰা ৭ টা পানী যোগান প্ৰকল্প ধনেখোৱাৰ পৰাই কেন্দ্ৰীয়ভাৱে শুভাৰম্ভ কৰে স্বাস্থ্য মন্ত্ৰী কেশৱ মহন্তই । এই প্ৰকল্পসমূহৰ জৰিয়তে ধনেখোৱা, শাকমুঠি, ঔগুৰি, ১ নং পানীগাওঁ, ২ নং পানীগাঁও, বৰুৱাআটী আৰু ৰহধলা অঞ্চলৰ কৃষিভূমিত পৰ্যাপ্ত পৰিমাণে পানী যোগান ধৰি কৃষকসকলক উপকৃত কৰিব বুলি আশা প্ৰকাশ কৰা হৈছে ।
