ডিজিটেল সংবাদ, গোলাঘাটঃ গোলাঘাট জিলাৰ ঐতিহ্যমণ্ডিত শ্ৰীশ্ৰীআঠখেলীয়া নামঘৰৰ সৌজন্যত আৰু কমাবন্ধাৰ খণ্ড প্ৰাথমিক স্বাস্থ্য কেন্দ্ৰৰ উদ্যােগত শুকুৰবাৰে আঠখেলীয়া উচ্চ মাধ্যমিক বিদ্যালয়ৰ প্ৰাংগনত স্বাস্থ্য মেলা অনুষ্ঠিত হৈ যায় ৷ পুৱা ১০ বজাৰ পৰা দুপৰীয়া ১:৩০ বজালৈ অনুষ্ঠিত হয় স্বাস্থ্য মেলা।
স্বাস্থ্য মেলাত স্ত্ৰী ৰোগ,মেডিচিন,চৰ্মৰোগ,নাক-কাণ-ডিঙি,দন্ত,চকু,হোমিঅ’,আয়ুৰ্বেদিক আৰু শিশু ৰোগকে ধৰি ৯ টা ৰোগৰ বিশেষজ্ঞ চিকিৎসকৰ উপস্থিতিত মুঠ ২০৯ জন ৰোগীক বিনামূলীয়াকৈ স্বাস্থ্য পৰীক্ষা কৰা হয় ৷ বিশেষ স্বাস্থ্য মেলাৰ দ্বাৰ উন্মোচন কৰে গোলাঘাট জিলা যুটীয়া স্বাস্থ্য সঞ্চালকালয়ৰ ভাৰপ্ৰাপ্ত যুটীয়া স্বাস্থ্য সঞ্চালক ৰণজিৎ ভূঞাই ৷
আঠখেলীয়া ক্ষুদ্ৰ প্ৰাথমিক স্বাস্থ্য কেন্দ্ৰৰ চিকিৎসক ডাঃ লুটফুৰ ৰহমান,কৰ্মসূচী প্ৰবন্ধক উৎপল পৰ্ণা হাজৰিকা তত্বাৱধানত অনুষ্ঠিত হোৱা স্বাস্থ্য মেলাত জিলা স্বাস্থ্য বিভাগৰ ভালেকেইজন বিশেষজ্ঞ চিকিৎসক-কৰ্মচাৰী,আশা কৰ্মীয়ে বিশেষ স্বাস্থ্য মেলাত সেৱা আগবঢ়াই ৷
স্বাস্থ্য মেলাত ৰেচন কাৰ্ড আৰু আধাৰ কাৰ্ড সংলগ্ন ম’বাইল নম্বৰ লৈ যোৱা ৰোগীৰ পৰিয়ালক আয়ুস্মান কাৰ্ডৰ সুবিধা প্ৰদান কৰা হয় ৷ নামঘৰৰ কৰ্ণধাৰ সমিতিৰ এনে পদক্ষেপক ৰাইজে প্ৰশংসা কৰে ৷
