ৰাষ্ট্ৰীয় হস্ততাঁত দিৱসঃ কাজিৰঙাত তাঁতশালত সপোন ৰচিছে জীয়ৰী-বোৱাৰীয়ে

ডিজিটেল সংবাদ, কাজিৰঙাঃ আজি ৰাষ্ট্ৰীয় হস্ততাঁত দিৱস। এই দিনটোত বিশেষ চৰ্চা লাভ কৰিছে কাজিৰঙাৰ এখন বিশেষ গাঁৱে ৷ গাওঁখনৰ নাম হস্ততাঁত শিল্প পৰ্যটন গাওঁ ৷ য’ত তাঁতশালত ব্যস্ত হৈ পৰিছে গাওঁখনৰ শতাধিক মহিলা।

কাজিৰঙা ৰাষ্ট্ৰীয় উদ্যানৰ দাঁতিকাষৰীয়া গাওঁখন কেন্দ্ৰীয় বস্ত্ৰ মন্ত্ৰণালয়ৰ দ্বাৰা স্বীকৃতি প্ৰাপ্ত এখন গাওঁ ৷ তাঁতশালত এখন উন্নত আদৰ্শ গাঁৱৰ সপোন ৰচিছে গাঁৱৰ জীয়াৰী-বোৱাৰীসকলে ৷ নিজৰ গাঁওখনক আদৰ্শ গাঁও ৰূপে সজাই তোলাৰ লগতে তাঁতশালৰ মাজতে স্বাৱলম্বনৰ পথ বাচি লোৱাৰ পৰিকল্পনাত ব্যস্ত হৈ পৰিছে মহিলাসকল ৷

কেন্দ্ৰীয় বস্ত্ৰ মন্ত্ৰালয়ৰ সহযোগত উন্নত মানৰ প্ৰশিক্ষণ গ্ৰহণ কৰি বয়ন শিল্পত মনোনিৱেশ কৰিছে মহিলাসকলে ৷ কাজিৰঙালৈ অহা দেশী-বিদেশী পৰ্যটকক আকৰ্ষিত কৰিব পৰাকৈ অসমৰ থলুৱা বস্ত্ৰ তৈয়াৰ কৰাত ব্যস্ত মহিলাসকলৰ আশা যে- পৰ্যটকৰ মাধ্যমেৰে অসমৰ বয়ন শিল্পক দেশ-বিদেশলৈ প্ৰসাৰ কৰিব পৰা যাব ৷ তদুপৰি তেওঁলোকৰ আশা আমদানিকৃত বস্ত্ৰৰ সলনি থলুৱা বস্ত্ৰই বজাৰ দখল কৰিব পাৰিলে মুকলি হ’ব স্বাৱলম্বনৰ পথ।

Also Read: ধোঁৱা চাঙত গো-সুৰক্ষা আইনঃ বোকাখাত আৰক্ষীক এহাজাৰ দিয়ে পাৰ কৰে গো-ধন