ডিজিটেল সংবাদ কাজিৰঙাঃ অসমৰ পৰ্যটন ক্ষেত্ৰত গ্ৰামাঞ্চলৰ মহিলাসকলৰ বাবে আছে আৰ্থিক স্বাৱলম্বিতাৰ পথ ৷ ইয়াৰ উপযুক্ত ব্যৱহাৰৰ মাজেৰে গ্ৰাম্য পৰ্যটনৰ পথ প্ৰশস্ত কৰিব পাৰে গ্ৰামাঞ্চলৰ মহিলাসকলে।
অসমৰ পৰ্যটন ক্ষেত্ৰত গ্ৰামাঞ্চলৰ মহিলাৰ আৰ্থিক স্বাৱলম্বিতাৰ উৎকৰ্ষ সাধনৰ বাবে আয়াৰলেণ্ডৰ পৰা কাজিৰঙাত উপস্থিত হ’ল এগৰাকী মহিলা উদ্যোগী ৷ ৰাজ্য চৰকাৰৰ গ্ৰামাঞ্চলৰ মহিলা সবলীকৰণ আঁচনিৰ অধীনত অসমৰ পৰ্যটন ক্ষেত্ৰত গ্ৰামাঞ্চলৰ মহিলাসকল কেনেদৰে জড়িত হ’ব পাৰে তাৰে ধাৰণা দিবলৈ কাজিৰঙাত উপস্থিত হোৱা বিদেশী মহিলাগৰাকীয়ে কাজিৰঙাৰ গ্ৰামাঞ্চলৰ পৰিবেশত উৎফুল্লিত হৈ পৰে ৷
উদ্যোগী মহিলাগৰাকীয়ে প্ৰকাশ কৰে যে, সাধাৰণতে অধিক সংখ্যক বিদেশী পৰ্যটকে গ্ৰামাঞ্চলৰ পৰিবেশত নিশা কটাব বিচাৰে ৷ গতিকে সুন্দৰভাৱে 'হোম ষ্টে'ৰ ব্যৱস্থা কৰি গ্ৰামাঞ্চলতে বিদেশী পৰ্যটকক থকা খোৱাৰ ব্যৱস্থাৰে আৰ্থিকভাৱে লাভান্বিত হ’ব মহিলাসকল ৷
কাজিৰঙাৰ উদ্যোগী মহিলা ৰূপজ্যোতি গগৈৰ কাজিৰঙা হাটৰ আপ্যায়নত আপ্লুত মহিলাগৰাকীয়ে মহিলাসকলক এনেদৰে স্বাৱলম্বনৰ পথ মুকলি কৰিবলৈ আহ্বান জনায়।
