ডিজিটেল সংবাদ, গোলাঘাটঃ গোলাঘাট দক্ষিণ উন্নয়ণ খণ্ডৰ অন্তৰ্গত পূৱ বৰপথাৰ পঞ্চায়তত আঁচনি ৰূপায়ণৰ নামত ব্যাপক বিসংগতি সংঘটিত হোৱাৰ অভিযোগ উত্থাপিত হৈছে ৷ ৩ টা বছৰ অতিক্ৰম কৰাৰ পিছতো বৰচাপৰি ৰাজহুৱা ৰংগমঞ্চৰ নিৰ্মাণ সম্পূৰ্ণ কৰিব নোৱাৰাত এতিয়া ৰাইজৰ মাজত সৃষ্টি হৈছে তীব্ৰ প্ৰতিক্ৰিয়াৰ ৷
উল্লেখযোগ্য পঞ্চায়তটোৰ অন্তৰ্গত ৮ নং ৱাৰ্ডৰ বৰচাপৰিত এটা ৰংগমঞ্চ নিৰ্মাণ কৰিবৰ বাবে ১৪ ফাইনেঞ্চৰ পৰা ৬ লাখ টকা আৰু ১৫ ফাইনেঞ্চৰ পৰা ১ লাখ টকা আৱণ্টন হৈছিল ৷ কিন্তু বৰ্তমানলৈকে ৰাজহুৱা ৰংগমঞ্চটোৰ নিৰ্মাণ সম্পূৰ্ণ হোৱা নাই ৷
এইপৰ্যন্ত ভৱনটোত টিনপাতৰ লগতে দুৱাৰ খিৰিকি আৰু পকীবেৰৰ কামো সম্পূৰ্ণ কৰিব পৰা নাই দায়িত্বত থকা লোকলকলে ৷ বৰ্তমানৰ সভানেত্ৰী গীতামণি পেগু ৰেগনৰ মতে, উক্ত ৰংগমঞ্চটো নিৰ্মাণ সমিতিৰ সভাপতি আৰু ৱাৰ্ড সদস্যগৰাকীয়ে সেইসময়ৰ পঞ্চায়ত সচিবৰ সৈতে মিলি আঁচনিৰ প্ৰায়ভাগ ধনেই মোকলাই নিয়ে ৷
আনহাতে উক্ত ঘটনাৰ সৈতে দিগন্ত ফুকন নামৰ এজন বিতৰ্কিত ঠিকাভিত্তিক পঞ্চায়ত কৰ্মচাৰীৰ নামো সাঙুৰ খাই পৰিছে৷ সভানেত্ৰীগৰাকীৰ মতে ৰংগমঞ্চ নিৰ্মাণ সমিতিয়ে নিৰ্মাণকাৰ্যত ব্যৱহৃত সামগ্ৰী ক্ৰয় কৰিবৰ বাবে দিগন্ত ফুকনক টকা মোকলাই দিছিল ৷ কিন্তু প্ৰায় দুটা বছৰ পূৰ্বে অব্যাহতি দিয়া দিগন্ত ফুকন নামৰ লোকজনে বৰ্তমানেও উক্ত সামগ্ৰীসমূহ নিদিয়াত ৰংগমঞ্চটো সম্পূৰ্ণ হৈ উঠা নাই ৷
