ডিজিটেল সংবাদ, সৰুপথাৰঃ গোলাঘাট জিলাৰ অন্তৰ্গত ধনশিৰি মহকুমাৰ অসম নাগালেণ্ড সীমান্তৱৰ্তী বি চেক্টৰৰ য়াম্ফা ভিলেজত নিৰপেক্ষ বাহিনী হিচাপে নিয়োজিত চিআৰপিএফৰ দ্বাৰা বিভিন্ন সময়ত বহু জনকল্যাণ মূলক আঁচনি ৰূপায়ণ কৰি আহিছে৷ আজিও অসম নাগালেণ্ড সীমান্তত চিআৰপিএফৰ দ্বাৰা তেনে এক জনকল্যাণমূলক আঁচনি ৰূপায়ণ হয়।
বি চেক্টৰৰ য়াম্ফা মাধ্যমিক ইংৰাজী বিদ্যালয়ত ছাত্ৰ-ছাত্ৰীৰ সুবিধাৰ্থে নিৰ্মাণ কৰা হয় খোৱাপানী আৰু শৌচালয়। আজি এই নিৰ্মীয়মান আঁচনি য়াম্ফা ভিলেজ কাউন্সিলক হস্তান্তৰ কৰে চিআৰপিএফে ৷ লগতে বিবদমান এ আৰু বি চেক্টৰৰ ৭ খন গাঁৱলৈ সৌৰশক্তি চালিত লাইটৰো যোগান ধৰে নিৰপেক্ষ বাহিনীটোৱে ৷
উক্ত কাৰ্যসূচীত মুখ্য অতিথি হিচাপে চিআৰপিএফৰ ১৫৫ নং বেটেলিয়নৰ চি.অ অবিনাশ চৰণ উপস্থিত থাকে ৷ লগতে অনুষ্ঠানত চিআৰপিএফৰ বি চেক্টৰৰ বিষয়া সন্তোষ কুমাৰ সিং, এ চেক্টৰ বিষয়া কুশল চৌধুৰীৰ তথা বিদ্যালয়খনৰ প্ৰধান শিক্ষক আৰু গাঁওপ্ৰধান ও স্থানীয় ৰাইজ উপস্থিত থাকে৷ উল্লেখযোগ্য যে, এ চেক্টৰৰ সৰ্বমুঠ ৩ খন আৰু বি চেক্টৰৰ ৪ খন গাঁৱত সৌৰশক্তিচালিত লাইটৰ যোগান ধৰা হয় ৷
