ডিজিটেল সংবাদ,বেকাজান : কেন্দ্ৰই নাগালেণ্ডৰ ৬খন পূব জিলা– টুৱেনছাং, মন, লংলেং, কিফিৰে, শ্বামাটৰ আৰু নোক্লকৰ বাবে ‘স্বায়ত্তশাসিত পৰিষদ’ প্ৰদানৰ প্ৰস্তাৱৰ চূড়ান্ত চুক্তি স্বাক্ষৰ কৰাৰ দিশে আগবাঢ়িছে । সম্ভৱতঃ সংসদৰ বৰ্ষাকালীন অধিবেশনৰ পূৰ্বে চূড়ান্ত চুক্তি স্বাক্ষৰ হোৱাৰ সম্ভাৱনা আছে ।
এই সন্দৰ্ভত শনিবাৰে ডিমাপুৰত এক বৈঠক অনুষ্ঠিত হয়, য’ত উপস্থিত থাকে ইষ্টাৰ্ণ নাগালেণ্ড পিপলছ অৰ্গেনাইজেচনৰ সদস্য, ইষ্টাৰ্ণ নাগালেণ্ড লেজিছলেটৰ ইউনিয়ন, অঞ্চলটোৰ শীৰ্ষ জনজাতীয় সংস্থা, টক টিমৰ সদস্য আৰু ফ্ৰন্টল সংগঠন। বৈঠকৰ সৈতে জড়িত সূত্ৰসমূহে জানিবলৈ দিয়া মতে, ভাৰত চৰকাৰ আৰু ইএনপিঅ’ৰ মাজত হোৱা চুক্তিৰ বিষয়বস্তুৰ বিষয়ে সদস্যসকলক অৱগত কৰা হয়।
উল্লেখযোগ্য যে চলিত বৰ্ষৰ ফেব্ৰুৱাৰী মাহত ই এন পি অ’ আৰু ভাৰত চৰকাৰৰ মাজত গুৰুত্বপূৰ্ণ আলোচনাৰ পিছত পৃথক সীমান্ত নাগালেণ্ডৰ দাবী সমাধান কৰা হয়। পূব নাগালেণ্ড অঞ্চলসমূহৰ বাবে ‘সীমান্ত নাগা টেৰিটৰী’ৰ বাবে চুক্তিবদ্ধ হৈছিল।
অৱশ্যে সমাধান কৰিবলগীয়া কিছুমান বিষয়ৰ ভিতৰত নতুন ব্যৱস্থাটোৰ নামকৰণ চূড়ান্ত কৰিব পৰা নাই। জানিব পৰা মতে এন পি অ’ৰ বিষয়াসকলে এম এইচ এ কমিটীৰ সদস্যসকলৰ সৈতে অতি সোনকালে আন এক আলোচনা কৰাৰ সম্ভাৱনা আছে আৰু চূড়ান্ত চুক্তি স্বাক্ষৰ কৰাৰ তাৰিখ চূড়ান্ত কৰাৰ সম্ভাৱনা আছে।
উল্লেখযোগ্য যে দীৰ্ঘদিন ধৰি নাগালেণ্ডৰ ৬খন জিলাক লৈ সুকীয়া ফ্ৰণ্টিয়াৰ নাগালেণ্ডৰ দাবী প্ৰবল হৈ পৰাত কেন্দ্ৰীয় চৰকাৰে নাগালেণ্ড পূবৰ ৬খন জিলাৰ বাবে ‘স্বায়ত্তশাসিত পৰিষদ’ গঠনৰ বাবে কেন্দ্ৰৰ প্ৰস্তাৱিত প্ৰস্তাৱ মানি লয়।
