দুৰ্গা পূজাত কৰ আৰোপ চৰকাৰৰ, হঠকাৰী সিদ্ধান্ত আখ্যা ৰিপুন বৰাৰ

ডিজিটেল ডেস্কঃ ঋণৰ বোজাত ককবকাই থকা অসমৰ বিজেপি চৰকাৰে ৰাজহ সংগ্ৰহৰ বাবে সকলো ক্ষেত্ৰতে কৰ আৰোপ কৰি সৰ্বসাধৰ জনতাক এতিয়া জ্বলাকলা খুৱাবলৈ আৰম্ভ কৰিছে৷ বিদ্য়ুতৰ মাচুল বৃদ্ধি, পৌৰ কৰ বৃদ্ধি, পৰিবহণ কৰ বৃদ্ধি আদিৰ পিছত এইবাৰ ধৰ্মীয় অনুষ্ঠানকো কৰৰ ভিতৰত সামৰি লৈছে মুখ্যমন্ত্ৰী হিমন্ত বিশ্ব শৰ্মা নেতৃত্বধীন বিজেপি চৰকাৰে৷

এইবাৰ কৰৰ ফন্দিৰ পৰা সৰি যোৱা নাই সাতামপুৰুষীয়া শাৰদীয় দুৰ্গোৎসৱো ৷ শেহতীয়াকৈ চৰকাৰে আগন্তুক দুৰ্গা পূজা আয়োজনৰ অনুমতিৰ বাবেও মাচুল ধাৰ্য কৰিছে৷ ৰাজ্য চৰকাৰৰ এই সিদ্ধান্তক হঠকাৰী আখ্য দিছে অসম তৃণমূল কংগ্ৰেছৰ সভাপতি তথা ৰাজ্যসভাৰ প্ৰাক্তন সাংসদ ৰিপুন বৰাই৷

এক ভিডিঅ’ বাৰ্তযোগে শুকুৰবাৰে অসম তৃণমূল কংগ্ৰেছৰ সভাপতিগৰাকীয়ে কয় যে- দুৰ্গা পুজাৰ দৰে পৱিত্ৰ আধ্যত্মিক অনুষ্ঠানৰ ওপৰত কৰ আৰোপ কৰাটো অতি দুৰ্ভাগ্যজনক৷ এইবেলি প্ৰতিখন দুৰ্গাপূজা কমিটিয়ে দুৰ্গা পূজা পতাৰ বাবদ ৩০০ টকা আৰু প্ৰতিমা বিসৰ্জনত বাবদ চৰকাৰক ১০০ কৰ টকা দিব লাগিব৷

এই সিদ্ধান্ত এক হঠকাৰী সিদ্ধান্ত আৰু জন বিৰোধী৷ অসমৰ ৰাইজে যুগ যুগ ধৰি মা দুৰ্গাৰ আৰাধনা কৰি আহিছে৷ ইয়াৰ বাবে কোনো দিনে কোনো ধৰণৰ কৰ দিব লগা হোৱা নাছিল৷ কিন্তু বিজেপি চৰকাৰে এইবাৰ পুজাৰ দৰে পৱিত্ৰ কাৰ্যসূচীতো কৰ আৰোপ কৰিছে৷ এই সিন্ধান্তই ৰাইজৰ আবেগ অনুভুতিক আঘাত হানিব৷

ভিডিঅ’ বাৰ্তাটোত অসম তৃণমূল কংগ্ৰেছে চৰকাৰৰ এই হঠকাৰী সিদ্ধান্তৰ তীব্ৰ বিৰোধিতা কৰিছে বুলি উল্লেখ কৰি সভাপিত ৰিপুন বৰাই কয় যে- দেৱী দুৰ্গাৰ আৰাধনা বাবে যদি ৰাজ্যবাসীয়ে কৰ দিব লগা হয়, তেন্তে তাতকৈ দুখজনক আৰু পৰিতাপৰ বিষয় একো নাথাকিব৷ সেয়ে ৰাজ্য চৰকাৰে এনে হঠকাৰী সিদ্ধান্ত শীঘ্ৰে বাতিল কৰা উচিত৷

উল্লেখ্য যে, ৰাজ্য চৰকাৰে এইবেলি প্ৰতিখন দুৰ্গা পুজাৰ বাবদ ৩০০ টকা আৰু প্ৰতিমা বিসৰ্জনত ১০০ টকাৰ মাচুল দিয়াটো বাধ্যতামূলক কৰিছে৷ এই মাচুল ট্ৰেজাৰি চালান (কোষাগাৰ চালান) যোগে আদায় দিয়াৰ পিছতহে পূজা অনুষ্ঠিত কৰা বা বিসৰ্জন দিয়াৰ অনুমতি লাভ কৰিব পূজা কমিটি সমূহে।

Also Read: পুনৰ বহিঃৰাজ্যত মৃত্যু অসমৰ শ্রমিকৰ