ডিজিটেল সংবাদ ধুবুৰীঃ পুৰীৰ শ্ৰীমন্ত শংকৰদেৱ নামঘৰ প্ৰাংগণত বুধবাৰৰ পৰা অনুষ্ঠিত হোৱা পুৰী মহোৎসৱৰ আজি সামৰণি পৰে ৷ কোচ বিহাৰৰ মধুপুৰ সত্ৰ সমিতিৰ প্ৰচাৰ সম্পাদক যুগান্ত বায়নে জনোৱা মতে ৰাজ্যৰ বিভিন্ন প্ৰান্তৰ পৰা অহা সহস্ৰাধিক ভক্তপ্ৰাণ ৰাইজৰ উপস্হিত আজি পুৱা পালনাম অনুষ্ঠিত হয় ৷
আজি পুৱা বিক্ৰম বনিয়াই জাগৰণৰ গীত পৰিবেশন কৰে ৷ পিছত আইসকলৰ নাম প্ৰসংগৰ পিছত শৰণাচাৰ্য বীৰেন্দ্ৰ পাঠকে নিত্য প্ৰসংগ কৰাৰ পিছত পালনাম আৰম্ভ হয় ৷
সংগীত নাটক অকাডেমী বঁটা প্ৰাপক গুনীন্দ্ৰ নাথ ওজাই পালনামৰ মুখ্য পাঠক হিচাপে অংশগ্ৰহণ কৰে ৷ পালনামত পাঠক ৰামায়ণ দাস, ডিম্বেশ্বৰ ভূঞাই নাম পৰিবেশন কৰে৷
পালনামৰ অন্তত শ্ৰীমন্ত শংকৰদেৱ সংস্কৃতি সমাজ পুৰী প্ৰকল্পৰ সম্পাদক বীৰেন্দ্ৰ নাথ পাঠকে সমাজৰ সকলোৰে হৈ আশীশ মাগি থানৰ বাতৰি সোধাত থানৰ বাতৰি কয় সুন্দৰীদিয়া সত্ৰৰ সত্ৰাধিকাৰ নিৰ্মল অধিকাৰীয়ে ৷
অজি পালনামত সহস্ৰাধিক ভক্তই অংশগ্ৰহণ কৰে ৷ ইপিনে বুধবাৰে নিশা অনুষ্ঠিত হোৱা সত্ৰীয়া সাংস্কৃতিক অনুষ্ঠানত সত্ৰীয়া নৃত্য, ভোৰতাল নৃত্য, লোকগীত, হোলীগীতৰ লগতে ওৰিষ্যা ড্যান্স একাডেমীয়ে ওডিচি নৃত্য পৰিবেশন কৰে ৷
ইয়াৰ পূৰ্বে সংগীত নাটক অকাডেমী বঁটা প্ৰাপক ৰঞ্জুমণি শইকীয়াক শ্ৰীমন্ত শংকৰদেৱ সংস্কৃতি সমাজ পুৰী প্ৰকল্পই সম্বৰ্ধনা জনায় ৷ আজিৰ মহাপালনামত অসমৰ বিভিন্ন ঠাইৰ পৰা অহা ভকতৰ উপৰিওঁ ওৰিষাৰ বহু সংখ্যক কৃষ্ণ ভক্তই অংশ গ্ৰহণ কৰে ৷
আজিৰ পালনামত বৰপেটাৰ সুন্দৰীদিয়া সত্ৰৰ সত্ৰাধিকাৰ নিৰ্মল অধিকাৰী, ধূৱাহাটা বেলগুৰিৰ সত্ৰৰ সত্ৰাধিকাৰ মুনীন্দ্ৰ গোস্বামী আৰু ঔতলা সত্ৰৰ সত্ৰাধিকাৰ বাবুল ডে কাই অংশ গ্ৰহণ কৰে ৷ বিয়লি মঞ্চত থিয় নাম পৰিবেশন কৰে বৰঙাজুলি সত্ৰৰ মহিলা নাম দলে থিয় নাম পৰিবেশন কৰে ৷
